اسلام آباد۔13جون (اے پی پی): قومی اسمبلی کی ہائوس بزنس ایڈوائزری کمیٹی نے بجٹ اجلاس کے شیڈول کی منظوری دے دی ہے جس کے مطابق اجلاس 24 جون تک جاری رکھا جائے گا ۔ منگل کوسپیکر قومی اسمبلی راجہ پرویز اشرف کی زیر صدارت ہاؤس بزنس ایڈوائزری کمیٹی کا اجلاس منعقد ہوا ۔اجلاس میں رواں بجٹ اجلاس کو بروز ہفتہ 24 جون 2023 تک جاری رکھنے پر اتفاق کیا گیا۔
اجلاس میں بجٹ اجلاس کے ایجنڈے اور دورانیے پر تبادلہ خیال کیا گیا، کمیٹی اجلاس میں بجٹ 24 ۔ 2023 پر 17 جون تک عام بحث جاری رکھنے پر اتفاق کیا ۔ بعدازں سینیٹ آف پاکستان کی طرف سے دی گئی سفارشات پر غور کیا جائے گا اور 19 جون 2023 کو وزیر خزانہ بجٹ 24 ۔ 2023 پر عام بحث کو سمیٹیں گے۔ غیر تصویبی اخراجات (چارج ایکسپنڈیچرز) پر بحث 20 جون کو ہوگی جبکہ کٹوتی کی تحریکوں پر بحث 21 اور 22 جون کو ہو گی۔
فنانس بل، 2023 پر غور اور منظوری 23 جون کے لیے تجویز کی گئی ہے، جب کہ 24 جون کو 2021،2022 اور 2023 کے لیے گرانٹس کے ضمنی مطالبات زر پر بحث کی جائے گی۔کمیٹی اجلاس میں فیصلہ کیا گیا کہ بجٹ اجلاس کو بروز ہفتہ 17 جون اور 24 کو بھی جاری رکھا جائے گا۔
اجلاس میں وفاقی وزرا رانا تنویر حسین، مرتضیٰ جاوید عباسی، شازیہ مری اور اراکین قومی اسمبلی خالد حسین مگسی، حامد حمید، ڈاکٹر رمیش کمار وانکوانی، صابر حسین قائم خانی، مولانا عبدال اکبر چترالی، چوہدری برجیس طاہر، قومی اسمبلی کے سیکرٹری طاہر حسین اور ایڈیشنل سیکرٹری قانون سازی محمد مشتاق نے شرکت کی۔
