اسلام آباد۔21جون (اے پی پی):قومی اسمبلی کی قائمہ کمیٹی برائے خزانہ و محصولات کا اجلاس چیئرمین سید نوید قمر کی صدارت میں پارلیمنٹ ہاؤس اسلام آباد کے کمیٹی روم نمبر 02 میں منعقد ہوا، جس میں متعدد اہم ٹیکس قوانین میں مجوزہ ترامیم کا جائزہ لیا گیا۔اجلاس کے دوران اسلام آباد کیپیٹل ٹیریٹری (سروسز پر ٹیکس) آرڈیننس 2001 میں مجوزہ ترامیم پر تفصیلی غور کیا گیا۔
کمیٹی نے سفارش کی کہ یہ ترامیم قومی اسمبلی سے منظور کی جائیں۔کمیٹی نے مزید درج ذیل قوانین پر بھی غور کیا۔ڈیجیٹل موجودگی آمدنی ٹیکس ایکٹ 2025 – جسے معمولی ترامیم کے ساتھ منظور کرنے کی سفارش کی گئی۔انکم ٹیکس آرڈیننس 2001 جس میں مجوزہ ترامیم کی منظوری دی گئی اور بعض دفعات میں مزید اصلاحات اور ترامیم تجویز کی گئیں۔
اجلاس میں اراکینِ قومی اسمبلی عمر ایوب خان، زیب جعفر، محمد عثمان اویسی، محمد جاوید حنیف خان، ڈاکٹر مرزا اختیار بیگ، ڈاکٹر نفیسہ شاہ، شرمیلا صاحبہ ہشام، محمد مبین عارف، اسامہ احمد میلا، شہرام خان، شاہدہ بیگم، سمیع الحسن گیلانی، علی زاہد، وزیر خزانہ و محصولات، وزیر مملکت، سیکرٹری خزانہ اور چیئرمین ایف بی آر نے شرکت کی۔
