اسلام آباد۔2ستمبر (اے پی پی):قومی اسمبلی کی قائمہ کمیٹی برائے ہائوس اینڈ لائبریری نے پارلیمنٹ لاجز توسیع منصوبے پر عرصہ دراز سے سست روی پربرہمی کا اظہار کیا ہے۔قائمہ کمیٹی کا اجلاس ڈپٹی سپیکر قومی اسمبلی سید غلام مصطفیٰ شاہ کی زیر صدارت منگل کو پارلیمنٹ ہائوس اسلام آباد میں منعقد ہوا۔ اجلاس کے دوران کمیٹی کے اراکین کو پارلیمنٹ لاجز سے ملحقہ اضافی 104 فیملی سوٹس اور 400 سرونٹ کوارٹرز کی تعمیر سے متعلق بریفنگ دی گئی۔ کمیٹی کے اراکین نے عرصہ دراز سے جاری اس اہم منصوبے پر کام کی سست روی پر برہمی کا اظہار کیا۔کمیٹی کے اراکین نے پارلیمنٹ لاجز میں موجودہ پارکنگ سپیس کو توسیع دینے سمیت تمام جاری ترقیاتی کاموں کو بروقت مکمل کرنے کی ضرورت پر زور دیا۔
کمیٹی نے پارلیمنٹ لاجز میں مزید سی سی ٹی وی کیمرے نصب کرنے کی ضرورت پر بھی زور دیا۔ کمیٹی کو بتایا گیا کہ موجودہ 40 کیمروں میں سے صرف 30 فعال ہیں جبکہ باقی کام نہیں کر رہے۔ کیپٹل ڈویلپمنٹ اتھارٹی کے حکام نے کمیٹی کو یقین دہانی کرائی کہ تین ماہ کے اندر تمام کیمرے فعال بنا دیئے جائیں گے۔ کمیٹی کے اراکین نے پارلیمنٹ لاجز میں سکیورٹی کے مسائل کو بھی اجاگر کیا اور نشاندہی کی کہ اسلام آباد پولیس کے صرف 6 ڈیوٹی انجام دے رہے ہیں۔ کمیٹی نے پارلیمنٹ لاجز کے سکیورٹی نظام کو مزید موثر اور مضبوط بنانے کی ضرورت پر زور دیا۔ اراکین نے پارلیمنٹ لاجز میں عرصہ دراز سے درپیش مرمتی مسائل کی بھی نشاندہی کی جن میں پانی کا رسائو، دیمک کے تدارک اور دیگر ساختیاتی مسائل شامل ہیں۔اجلاس میں اراکین قومی اسمبلی اعجاز حسین جاکھرانی، محمد معین امیر پیرزادہ، عالیہ کامران، چیئرمین سی ڈی اے، سی ڈی اے کے دیگر اعلیٰ حکام، اسلام آباد پولیس اور وزارت خزانہ کے حکام نے شرکت کی۔
