اسلام آباد۔18مارچ (اے پی پی):قومی بلائنڈ خواتین کرکٹ ٹیم آسٹریلیا کے خلاف پانچ ٹی ٹونٹی میچوں کی سیریز میں شرکت کے لئے 17 اپریل کو اسلام آباد سے آسٹریلیا کے لئے روانہ ہوگی، دونوں ممالک کے مابین پانچ ٹی 20 میچوں کی سیریز کھیلی جائے گی ۔پاکستان بلائنڈ کرکٹ کونسل کے چیئرمین اور ورلڈ بلائنڈ کرکٹ لمیٹڈ کے صدر سید سلطان شاہ نے ’’اے پی پی ‘‘کو بتایا کہ پاکستان اور آسٹریلیا خواتین کرکٹ ٹیموں کے مابین پانچ ٹی 20 میچوں پرمشتمل سیریز 18 سے 26 اپریل تک کھیلی جائے گی ۔
سیریز کے تمام میچز برسبین کرکٹ سٹیڈیم آسٹریلیا میں ہوں گے۔ انہوں نے کہا کہ ایونٹ کی تیاری کے لئے قومی خواتین بلائنڈ کرکٹ ٹیم کا تربیتی 6 سے 15 اپریل تک لاہور میں لگایا جائے گا جس میں سیریز کے لئے منتخب شدر 17 کھلاڑیوں کو مدعو کیا جائے گا اور ان کھلاڑیوں کو کوچز عبدالرزاق، بختاور اقبال اور ٹرینر شاہدہ جدید اور اعلیٰ معیار کی تربیت دیں گے۔ انہوں نے کہا کہ تربیتی کیمپ میں جن کھلاڑیوں کو مدعو کیا گیا ہے ان میں رمشاء شبیر، شمائلہ کرن، سائرہ، بشرا ظہور،ایشا فیصل ،نمرارفیق، کرن رفیق، نصرت بتول ،مریم خان ،خوریہ ملک ، رابعہ نوید،نیشا، ایمان ارشد،مہرین علی، فرحت غفور، ارمین طارق اور نور فاطمہ شامل ہیں۔
انہوں نے کہا کہ ان کھلاڑیوں کا انتخاب گزشتہ ماہ 19 سے 24 فروری تک اسلام اباد میں ہونے والے چوتھی قومی خواتین بلائنڈ کرکٹ چیمپئن شپ میں شاندار کارکردگی کی بنیاد پر کیا گیا ہے۔ سید سلطان شاہ نے بتایا کہ قومی خواتین بلائنڈ کرکٹ ٹیم کا یہ پہلا بیرونی دورہ ہے اور آسٹریلیا بلائنڈ کرکٹ ٹیم کی اپنی سرزمین پر پہلی ہوم سیریز ہوں گی۔
انہوں نے کہا کہ آسٹریلیا خواتین بلائنڈ کرکٹ ٹیم کے خلاف سیریز کے لئے قومی کھلاڑیوں کو کارکردگی کی بنیاد پر قومی ٹیم میں شامل کیا گیا ہے ،امید ہے کہ قومی ٹیم آسٹریلیا کی بلائنڈ کرکٹ ٹیم کے خلاف سیریز میں شاندار کارکردگی کامظاہرہ کر کے کامیابی حاصل کرے گی۔
Short Link: https://urdu.app.com.pk/urdu/?p=573800
