اسلام آباد۔12مارچ (اے پی پی):وفاقی وزیر برائے قومی صحت سید مصطفیٰ کمال نے کہا ہے کہ قوم کے بچوں کو مستقل معذوری سے نجات دلانا ہو گی، اس مشن کی کامیابی کے لئے قومی یکجہتی اور مشترکہ کوششیں ناگزیر ہیں۔ان خیالات کا اظہار انہوں نے نیشنل ایمرجنسی آپریشن سینٹر برائے پولیو کا دورہ کرنے کے دوران کیا ۔وزیراعظم کی فوکل پرسن برائے پولیو عائشہ رضا فاروق بھی نیشنل ایمرجنسی آپریشن سینٹر قیادت نے وزیر صحت کا استقبال کیا۔
وفاقی وزیر صحت سید مصطفیٰ کمال کی زیر صدارت پولیو جائزہ اجلاس ہوا۔وفاقی وزیر صحت کو انسداد پولیو مہم کی موجودہ صورتحال اور درپیش چیلنجز پر تفصیلی بریفنگ دی گئی ۔گزشتہ سال 74 پولیو کیسز رپورٹ ہوئے رواں سال اب تک صرف 6 کیسز سامنے آئے۔پولیو کے خاتمے کے لیے صوبوں کے ساتھ مل کر مربوط حکمت عملی تشکیل دی ہے ۔ وائرس کے پھیلائو کو روکنے کے لیے تمام تر اقدامات کیے جا رہے ہیں ۔
سید مصطفیٰ کمال پولیو کا خاتمہ ناگزیر ہو چکا ہے، پولیو کا خاتمہ ہماری قومی ذمہ داری ہے، پولیو کے خاتمے کی کوششوں میں مزید تیزی لائی جائے گی۔انہوں نے کہا کہ کمیونیٹیز کو آمادہ کیا جائے، ان کی مدد کے ساتھ بچوں کو پولیو کے قطرے ضرور پلائیں ۔انہوں نے کہا کہ پختہ عزم کر رکھا ہے اور میری کوشش ہوگی کہ اس دور میں انشاء اللہ پاکستان کو پولیو فری بنائیں ۔
Short Link: https://urdu.app.com.pk/urdu/?p=571581
