اسلام آباد۔6مارچ (اے پی پی):وزیراعظم محمد شہباز شریف نے پاکستان ٹیلی ویژن ، فلم، ریڈیو اور سٹیج کے ممتاز اداکار قوی خان کے انتقال پر گہرے افسوس اور رنج کا اظہار کیا ہے۔ پیر کو وزیراعظم آفس کے میڈیا ونگ سے جاری بیان کے مطابق وزیراعظم شہباز شریف نے مرحوم کی بلندیء درجات کے لیے دعا اور ان کے خاندان سے تعزیت کا اظہار کیا ہے۔
وزیراعظم نے کہا کہ قوی خان کے انتقال سے پاکستان ایک لیجنڈ اداکار سے محروم ہو گیا ، قوی خان ایک اکیڈمی کی حیثیت رکھتے تھے ،ان کے پائے کا اداکار صدیوں میں پیدا ہوتا ہے ، قوی خان نے ریڈیو پاکستان پشاور سے چائلڈ سٹار کے طور پر کام شروع کیا جو ان کے فطری ٹیلنٹ کا ثبوت ہے،انہوں نے کہا کہ قوی خان ورسٹائل اداکار تھے جنہوں نے ہر طرح کا کردار بخوبی ادا کیا اور انکی اداکاری حقیقت سے قریب تر اور قدرتی تھی ۔
وہ پاکستان ٹیلی ویژن کے اُن ابتدائی اداکاروں میں سے تھے جنہوں نے پاکستانی ٹیلی ویژن ڈراموں کی بنیاد رکھنے میں اہم کردار ادا کیا ۔ ’’لاکھوں میں تین‘‘اور ’’اندھیرا اجالا ‘‘میں ان کی اداکاری عوام کے ذہنوں میں آج بھی زندہ ہے۔ وزیراعظم نے کہا کہ تمغہ حسن کارکردگی اور ستارہ امتیاز کے اعزازات قوی خان کی فنکارانہ صلاحیتوں کا ریاستی سطح پر اعتراف ہیں ۔
پاکستانی ٹی وی اور فلم کے ناظرین ان کی کمی ہمیشہ محسوس کرتے رہیں گے ۔ وزیراعظم نے دعاکی کہ الله تعالیٰ مرحوم کو جنت الفردوس میں اعلیٰ مقام عطاء کرے ۔
