اقوام متحدہ۔22اگست (اے پی پی):پاکستان نے کشمیر اور فلسطین جیسے تنازعات کو حل کرنے ،تنازعات کے پیدائش کی مؤثر روک تھام اور متاثرہ ممالک میں امن قائم کرنے کے لئے موثر نقطہ نظر کی تشکیل کے حوالے سے نئی سوچ اپنانے کی ضرورت پر زور دیا ہے۔ا قوام متحدہ میں پاکستان کے مستقل مندوب منیر اکرم نےگزشتہ روز اقوام متحدہ کی سلامتی کونسل میں تنازعات کی روک تھام اور امن و امان کے قیام اور استحکام پر ایک اعلیٰ سطحی بحث کے دوران خطاب کرتے ہوئے کہا کہ ایک جامع اور مربوط حکمت عملی کی ضرورت ہے جو تنازعات کی روک تھام اور تنازعات کے حل کے لیے قومی کوششوں کے لیے علاقائی اور بین الاقوامی مدد فراہم کرے۔
پاکستانی مندوب نے کہا کہ اس طرح کی حکمت عملی میں مصیبت میں گھری ریاستوں کے لیے معاشی اور مالی مدد،روزگار پیدا کرنے اور اعتماد اور امید پیدا کرنے ،صلاحیت سازی کی تعمیر، حکومتوں کو مقامی آبادی کو درکار بنیادی خدمات فراہم کرنے کے قابل بنانا شامل ہونا چاہیئے۔ انہوں نے بیرونی استحصال کے خاتمے کا بھی مطالبہ کیا، جو تشدد اور دہشت گردی کو ہوا دیتا ہے۔ یہ اجلاس مغربی افریقی ملک سیرالیون کی طرف سے بلایا گیا تھا، جو اگست کے لیے سلامتی کونسل کی صدارت کے فرائض انجام دے رہا ہے اور یہ اجلاس عالمی سطح پر تنازعات میں اضافے کے پس منظر میں منعقد کیا گیا۔ پاکستانی مندوب نے کہا کہ ان تنازعات کی بنیادی وجوہات نوآبادیات کی وراثت، قلت خوراک، پانی اور چراگاہوں کے لیے مقامی جدوجہد، قیمتی قومی وسائل کے لیے بیرونی مسابقت اور لوگوں کی سیاسی اور اقتصادی منزلوں کو دوبارہ حاصل کرنے کی جدوجہد کو دبانے کے لیے ہونے والی مداخلتیں ہیں۔ پاکستانی مندوب نے سلامتی کونسل سے غزہ میں اسرائیل کی جانب سے فلسطینیوں کی نسل کشی کے خاتمے کامطالبہ کرتے ہوئے کہا کہ غیر ملکی قبضے کے نتائج بھارت کے غیر قانونی زیر تسلط جموں و کشمیر اور فلسطین میں کہیں بھی واضح نہیں ہیں۔
انہوں نے سلامتی اور بنیادی ضروریات اور خدمات کی فراہمی کو تسلیم کرتے ہوئے کہا کہ تشدد اور دہشت گردی کی قوتوں کے خلاف سماجی ہم آہنگی کی تعمیر ضروری ہے۔ انہوں نےکہا کہ اس طرح کی قومی حکمت عملی افریقہ اور دیگر ممالک میں ہمیں درپیش پیچیدہ بحرانوں سے نمٹنے کے لیے کافی نہیں ہے۔ ان میں سے زیادہ تر تنازعات کا پھیلاؤ اندرونی اور بیرونی مداخلت دونوں عوامل کی وجہ سے ہوا ہے جن کو سمجھنا اور حل کرنا ضروری ہے۔ انہوں نے کہا کہ قومی سطح پر تشدد کی روک تھام کی حکمت عملیوں کا تصور، جیسا کہ اقوام متحدہ کے سیکرٹری جنرل کے امن کے نئے ایجنڈے میں بیان کیا گیا ہے، قابل قدر ہے۔ منیر اکرم نے دہشت گردی کے خلاف جنگ میں پاکستان کے تجربے کا حوالہ دیتے ہوئے کہا کہ دہشت گردی کی روک تھام کے لئے پاکستان کا قومی ایکشن پلان، جسے عزم استحکام پاکستان کہا جاتا ہے، تشدد کی انتہا پسندی اور دہشت گردی کے خاتمے کے لیے مقامی کمیونٹیز کے ساتھ کام کرنے پر انحصار کرتا ہے۔ انہوں نے مزید کہا کہ پاکستان کے سرحدی علاقوں میں دہشت گردی کے خلاف جنگ مقامی کمیونٹیز کی حمایت، مدد اور شرکت کی وجہ سے کامیاب رہی۔بحث کا آغاز کرتے ہوئے، اقوام متحدہ کے ایک سینئر اہلکار نے کہا کہ تشدد کی وجہ سے گزشتہ سال دنیا کو تقریباً 20 ٹریلین ڈالر کا نقصان ہوا، لیکن امن اور تنازعات کی روک تھام کے لیے سرمایہ کاری میں مسلسل کمی آ رہی ہے۔
