لاہور۔6فروری (اے پی پی):ایف آئی اے امیگریشن نے لاہور ایئرپورٹ پر کارروائی کے دوران جعلی دستاویزات پر بیرون ملک سفر کرنے والے مسافر کو گرفتار کر لیا۔ترجمان کے مطابق گرفتار مسافر کی شناخت عدنان حیدر بھٹی کے نام سے ہوئی ہے ۔
ابتدائی تفتیش کے مطابق ملزم بین الاقوامی پرواز سے پولینڈ جارہا تھا۔ملزم کی جانب سے پیش کیا جانے والا پولینڈ کا ریزیڈنٹ کارڈ جعلی نکلا۔ترجمان نے بتایا کہ گرفتار ملزم کو مزید قانونی کاروائی کے لیے اینٹی ہیومن ٹریفکنگ سرکل لاہور کے حوالے کر دیا گیا ہے۔
ڈائریکٹر ایف آئی اے لاہور سرفراز خان ورک نے کہا ہے کہ لاہورایئرپورٹ پر مسافروں کی سکریننگ کا عمل جاری ہے۔ جعلی دستاویزات بنانے میں ملوث عناصر کے خلاف کریک ڈاون جاری ہے۔ مشکوک سفری دستاویزات کی تفصیلی جانچ پڑتال کو یقینی بنایا جائے۔ جعلی دستاویزات اور دھوکہ دہی سے بیرون ملک جانے والے ملزمان اور ان کے سہولت کاروں سے آہنی ہاتھوں سے نمٹا جائے گا۔ شہریوں سے درخواست کی جاتی ہے کہ اپنی سفری دستاویزات غیر متعلقہ لوگوں کے حوالے نہ کریں۔ ترجمان ایف آئی اے نے کہا کہ ویزا حصول کے لئے ہمیشہ متعلقہ ملک کی ایمبیسی یا نامزد کردہ ویزا ایپلی کیشن سینٹر سے رابطہ کریں۔
Short Link: https://urdu.app.com.pk/urdu/?p=556663
