لاہور سمیت دیگر علاقوں میں گرد آلود ہوائیں چلنے اورگرج چمک کے ساتھ بارش کا امکان ہے ،پی ڈی ایم اے

لاہور۔7مئی (اے پی پی):پی ڈی ایم اے پنجاب نے آندھی اور بارشوں کا الرٹ جاری کردیا۔ 7 سے 11 مئی تک صوبائی دارالحکومت لاہور سمیت پنجاب کے بیشتر اضلاع میں گرد آلود ہوائیں چلنے اور گرج چمک کے ساتھ بارش کا امکان ہے۔

ترجمان پی ڈی ایم اے کے مطابق لاہور،منڈی بہاوالدین،گجرات،گجرانوالہ،قصور ،سیالکوٹ،نارووال،اوکاڑہ،فیصل آباد،ٹوبہ ٹیک سنگھ،جھنگ،خوشاب، سرگودھا اور میانوالی میں آندھی و بارش کا امکان ہے ۔کل8 سے 10 مئی کے درمیان جنوبی پنجاب میں ملتان ،ڈیرہ غازی خان،بہاولپور اور بہاولنگر میں بارش طوفان اور جھکڑ چلنے کی پیشگوئی کی گئی ہے۔درایں اثنا ڈائریکٹر جنرل پی ڈی ایم اے عرفان علی کاٹھیا نے کہا کہ وزیر اعلی پنجاب کی ہدایت کے مطابق ضلعی انتظامیہ سمیت سکول ایجوکیشن،محکمہ صحت آبپاشی تعمیر و مواصلات لوکل گورنمنٹ، لائیو سٹاک ، انفارمیشن ڈیپارٹمنٹ ،واسا ،پنجاب پولیس اور سول ڈیفنس کو بھی موسمی صورتحال کے پیش نظر الرٹ جاری کردیا گیا ہے ۔

انہوں نے کہا کہ شہری آسمانی بجلی سے تحفظ کےلئے محفوظ مقامات پر رہیں۔عوام بجلی کی گرج چمک اور طوفانی صورتحال میں کھلے آسمان تلے ہرگز نہ جائیں۔ایمرجنسی صورتحال میں پی ڈی ایم اے ہیلپ لائن 1129 پر رابطہ کریں۔

Short Link: https://urdu.app.com.pk/urdu/?p=593922