لاہور۔2مئی (اے پی پی):لاہور پولیس کاجدید ٹیکنالوجی کی مدد سے قانون شکن عناصرکے خلاف کریک ڈائون جاری ہے،تین ماہ میں ہوٹل آئی اورٹریول آئی سافٹ ویئرز کے ذریعے43لاکھ15ہزار800سے زائد افرادکی چیکنگ عمل میں لائی گئی ہے۔ترجمان لاہور پولیس کے مطابق سمارٹ آئی ایپ کے ذریعے879ہوٹلز،1460ہوسٹلز اور177فیکٹریوں کی چیکنگ کی گئی ہے،دورانِ چیکنگ مختلف مقدمات میں ملوث816کریمینلز کوگرفتارکیا گیا ہے۔سی سی پی او لاہور بلال صدیق کمیا نہ نے کہاکہ جدید ٹیکنالوجی کی مدد سے مطلوب مجرمان کے گرد گھیرا تنگ کیا جا رہا ہے، تمام ہوٹلوں کی انتظامیہ کو اپنے مسافروں کا ڈیٹا ہوٹل آئی ایپ میں درج کرنے کا پابند بنایا جائے۔
انہوں نے کہاکہ ٹریول آئی ایپ کی مدد سے سفر کرنے والے مطلوب مجرمان کی نقل و حرکت پرکڑی نظر رکھی جائے گی، پولیس سافٹ ویئر میں ڈیٹاکا اندراج نہ کرنے والوں کے خلاف فوری قانونی کارروائی عمل میں لائی جائے۔بلال صدیق کمیانہ نے کہا کہ فیلڈ افسران ہوٹلوں، سرائے، قیام گاہوں اور بس اڈوں کی انسپیکشن خود کریں، قانون شکن عناصر کی نشاندہی کے لئے سوشل میڈیا پر مسلسل نظر رکھی جائے، جرائم پیشہ عناصر کی گرفتاری کیلئے جدید ٹیکنالوجی سے بھر پور استفادہ کیا جا رہا ہے۔
سی سی پی او نےکہاکہ جدید ٹیکنالوجی کا استعمال محفوظ اور پر امن معاشرے کے قیام کیلئے لازم و ملزوم ہے۔
Short Link: https://urdu.app.com.pk/urdu/?p=591066
