لاہور پولیس کی کاوشوں سے جرائم میں نمایاں کمی آئی ہے،بلال صدیق کمیانہ

لاہور۔8مئی (اے پی پی):سی سی پی او بلال صدیق کمیانہ کی زیر صدارت ماڈل ٹاون،کینٹ، سٹی اور سول لائنز ڈویژنزکی کارکردگی کا جائزہ اجلاس جمعرات کو ہوا۔ ترجمان کے مطابق اجلاس میں سوشل کرائمز کی روک تھام کیلئے موثر اقدامات اٹھانے پراتفاق کیا گیا۔سی سی پی او نے اجلاس سے گفتگو کرتے ہوئے کہا ہے کہ لاہور پولیس کی کاوشوں سے جرائم میں نمایاں کمی آئی ہے۔ کرائم کنٹرول کیلئے سی سی ڈی سے بھرپور تعاون کریں۔ جرائم کے خاتمے کیلئے صوبائی دارالحکومت میں سپیشلائزڈ یونٹ قائم کیا جائے گا۔ بھارتی جارحیت کے پیشِ نظر متعلقہ اداروں سے بہترین کوارڈینیشن رکھیں۔

وزیر اعلی پنجاب کے ویژن کے مطابق خواتین، بچوں اورکمزور طبقات کی شکایات کو ترجیحی بنیادوں پر حل کیا جائے۔سی سی پی او نے کہا کہ عیدالاضحی کے تناظر میں قربانی کے جانوروں کی چوری کی روک تھام کیلئے موثر حکمت عملی اپنائی جائے۔ عید الاضحی پر قائم ہونے والی مویشی منڈیوں میں اضافی فورس تعینات کی جائے، نوسر بازوں پر کڑی نظر رکھی جائے۔ غیر اخلاقی سرگرمیوں میں ملوث مساج سنٹرز، گیسٹ ہاوسز اور ہوٹلوں کے خلاف بھر پور کریک ڈاون کیاجائے۔ ہوائی فائرنگ پر زیروٹالرنس پالیسی اپنائیں۔بلال صدیق کمیانہ نے کہاکہ جوئے کی شکایت کی صورت میں متعلقہ ایس ایچ او ذمہ دار ہو گا۔کے پی آئیزپر فوکس کریں۔

بلال صدیق کمیانہ نے کہا کہ افسران ماتحت عملے سے مضبوط کوارڈینیشن قائم کریں اور ان کے محکمانہ امور سے متعلق مسائل کے حل کو یقینی بنائیں۔ مظلوم کی دادرسی اور انصاف کی فوری فراہمی ہماری اہم ذمہ داری ہے۔ ڈی آئی جی (ایڈمن)عمران کشور،ڈی آئی جی(انوسٹی گیشن)ذیشان رضا،ڈی آئی جی(آپریشنز)فیصل کامران، ایس ایس پی (انوسٹی گیشن)محمد نوید، ایس ایس پی (آپریشنز)تصور اقبال،ماڈل ٹاون،کینٹ، سٹی اور سول لائن ڈویژنز کے ایس پیز، اے ایس پیز،سرکل افسران، ایس ایچ اوز اور انچارجز(انوسٹی گیشن)نے اجلاس میں شرکت کی۔

Short Link: https://urdu.app.com.pk/urdu/?p=594285