طرابلس ۔19اگست (اے پی پی):لیبیا کی صدارتی کونسل نے نئے گورنر کی تقرری اور مرکزی بینک کے لیے نئے بورڈ آف ڈائریکٹرز کی تشکیل کی منظوری کا اعلان کیا ہے۔العربیہ کےمطابق اس فیصلے میں کہا گیا ہے کہ اس کا مقصد ملک کی صلاحیتوں کی حفاظت کرنا اور انہیں کسی بھی قسم کے نقصان سے بچانا ہے۔صدارتی کونسل نے جاری بیان میں وضاحت کی کہ لیبیا کے مرکزی بینک کے لیے نئے گورنر کے انتخاب کے حوالے سے ایوان نمائندگان کی قرارداد نمبر 3/2018 پر عمل درآمد کرنے اور ایک نیا بورڈ آف ڈائریکٹرز بنانے کا متفقہ فیصلہ کیا گیا۔
یہ قرارداد الصدیق الکبیر کی جگہ محمد عبدالسلام شکری کی مرکزی بینک کے گورنر کے طور پر تقرری سے متعلق ہے۔صدارتی کونسل نے کہا کہ مرکزی بینک کی انتظامیہ کی سربراہی میں کی جانے والی ان تبدیلیوں کا مقصد ملک میں مالی اور اقتصادی حالات کے استحکام کو یقینی بنانا ہے۔ اس اقدام کا مقصد مرکزی بینک کی اپنے کاموں کو بہتر اور مؤثر طریقے سے انجام دینے کی صلاحیت کو بڑھانا بھی ہے۔ انہوں نے مزید کہا کہ یہ قدم لیبیا میں نظم و نسق اور ادارہ جاتی استحکام کو مضبوط بنانے کے فریم ورک کے اندر آتا ہے۔امکان ہے کہ پارلیمان صدارتی کونسل کے فیصلے کو مسترد کر دے گی۔ خاص طور پر چونکہ اس نے چند روز قبل گورنر الصدیق الکبیر کی حمایت کا اعلان کیا تھاکہ وہ اپنے عہدے پر برقرار رہیں۔ یہ اقدام برسوں کے تنازعات سے منقسم ریاستی اداروں کو دوبارہ متحد کرنے کی برسوں کی کوششوں سے دور ہو جاتا ہے۔ اس سے ملک میں بدامنی اور سیاسی تعطل کے طویل ہونے کا بھی خدشہ ہے۔
