لیلتہ القدر خود احتسابی، توبہ اور اللہ کی رضا حاصل کرنے کا نادر موقع ہے، سردار ایاز صادق

اسلام آباد۔27مارچ (اے پی پی):سپیکر قومی اسمبلی سردار ایاز صادق نے کہا ہے کہ لیلتہ القدر خود احتسابی، توبہ اور اللہ کی رضا حاصل کرنے کا نادر موقع ہے، بابرکت رات کی ان ساعتوں میں ہمیں اپنے وطن عزیز کی ترقی و خوشحالی کے لیے بھی خصوصی دعائوں کا اہتمام کرنا چاہیے۔

سپیکر قومی اسمبلی نے لیلتہ القدر کے موقع پر اپنے پیغام میں کہا کہ لیلتہ القدر اللہ کا قرب اور بخشش مانگنے کا سنہرا موقع فراہم کرتی ہے، یہ وہ رات ہے جس میں قرآن پاک نازل ہوا، یہ بابرکت رات ہزار مہینوں سے افضل، رحمتوں اور مغفرت کا بہترین ذریعہ ہے۔

انہوں نے کہا کہ پاکستان کو درپیش چیلنجز کے حل کے لیے اسلامی تعلیمات پر عمل ضروری ہے، ہمیں اپنے ملک میں اتحاد اور یکجہتی کو فروغ دینا ہوگا تاکہ ہم ایک خوشحال پاکستان کی تعمیر کرسکیں۔لیلتہ القدر میں شہداء کو اپنی دعائوں میں یاد رکھیں، ہمارے شہداء ہمارا فخر ہیں جن کی قربانیوں کو کبھی فراموش نہیں کیا جاسکتا۔ سپیکر نے اس بابرکت رات میں اپنے فلسطینی اور کشمیری بہن بھائیوں کی آزادی و حق خود ارادیت کے لیے بھی خصوصی دعائوں کی بھی اپیل کی۔

Short Link: https://urdu.app.com.pk/urdu/?p=576787