مئی کے کرداروں کو نتائج بھگتنا پڑیں گے۔عظمی بخاری

لاہور۔22مئی (اے پی پی):وزیر اطلاعات پنجاب عظمی بخاری نے کہا ہے کہ9 مئی کے کرداروں کو نتائج بھگتنا پڑیں گے، بانی پی ٹی آئی پولی گرافک ٹیسٹ کرنے والی ٹیم سے چھپ رہے ہیں،وہ جان لیں یہ بنی گالہ نہیں اڈیالہ جیل ہے،بانی پی ٹی آ ئی اپنا جھوٹ بے نقاب ہونے کے خوف سے راہ فرار اختیار کر رہے ہیں۔جمعرات کے روز جاری اپنے ایک بیان میں انہوں نے کہا کہ بانی پی ٹی آئی3 دن سے پولی گرافک ٹیسٹ کرنے والی ٹیم سے چھپ رہے ہیں،حسب روایت انہوں نے تیسری مرتبہ پولی گرافک ٹیسٹ کروانے سے انکار کر دیا،

کبھی بادشاہ سلامت سو کر نہیں اٹھتے،کبھی کھانا کھا رہے ہیں اور کبھی ان کے وکلا نہیں آئے۔عظمی بخاری نے کہا کہ بانی پی ٹی آئی کو آج بھی یقین نہیں ہو رہا وہ سزا یافتہ مجرم ہیں،جیل میں قید ہیں،انہیںجان لینا چاہیے کہ یہ بنی گالہ نہیں بلکہ اڈیالہ جیل ہے۔وزیر اطلاعات نے کہا کہ پولیس پیچھے پیچھے ہے اور9 مئی کا ماسٹر مائنڈ آگے آگے ہے،بانی پی ٹی آئی اپنا جھوٹ بے نقاب ہونے کے خوف سے راہ فرار اختیار کر رہا ہے۔

عظمی بخاری نے کہا کہ بانی پی ٹی آئی کی بہنیں اور ان کی پارٹی قیادت روزانہ ہمیں عدالتی احکامات کی دلیلیں دیتے ہیں جبکہ بانی پی ٹی آئی خود عدالتی احکامات کو ماننے کیلئے تیار نہیں۔انہوں نے مزید کہا کہ 9 مئی ایک بغاوت اور ریاست کے خلاف سازش تھی، 9 مئی کے کرداروں اور سہولت کاروں کو اس کے نتائج بھگتنا پڑیں گے۔

Short Link: https://urdu.app.com.pk/urdu/?p=600201