لاہور۔22مارچ (اے پی پی):مادر جمہوریت بیگم نصرت بھٹو کی 96ویں سالگرہ کل (23مارچ) ملک بھر میں جوش و جذبے سے منائی جائے گی۔اس سلسلے میں پاکستان پیپلز پارٹی کی مختلف تنظیموں کے زیر اہتمام کیک کاٹنے کی تقاریب منعقد ہونگی اورپارٹی رہنما اور کارکن مادر جمہوریت کی سیاسی جدوجہد پر روشنی ڈالیں گے۔
پیپلز پارٹی سینٹرل پنجاب سیکرٹیریٹ میں بھی اس حوالے سے بھٹو لیگسی فائونڈیشن کے تحت ایک سالگرہ تقریب کا شام5بجے اہتمام کیا گیا ہے۔بیگم نصرت بھٹو کی سالگرہ پر انہیں خراج تحسین پیش کرتے ہوئے پیپلز پارٹی وسطی پنجاب کے صدر راجہ پرویز اشرف نے کہا کہ ضیا آمریت میں مادر جمہوریت کی جدوجہد پاکستان کی سیاسی تاریخ کا لازوال باب ہے،جنرل سیکرٹری سید حسن مرتضی نے کہا کہ بیگم بھٹو، آمریت اور جبر کے خلاف مزاحمت کی علامت اورجمہوریت پسندوں کے لیے ایک مستقل تحریک کا ذریعہ رہیں گی۔
سیکرٹری اطلاعات شہزاد سعید چیمہ نے کہا کہ مادر جمہوریت کے تذکرے کئے بغیر پاکستان کی سیاسی جدوجہد کی تاریخ نامکمل رہے گی۔
Short Link: https://urdu.app.com.pk/urdu/?p=575503
