اسلام آباد۔11مئی (اے پی پی):وزیر دفاع خواجہ محمد آصف نے کہا ہے کہ مارشل لا لگنے کا کوئی امکان نہیں ہے،جی ایچ کیو پر تحریک طالبان کے بعد تحریک انصاف نے حملہ کیا ہے ،ا گر کسی اور پارٹی یا تنظیم نے اس طرح کیا ہوتا تو پتہ نہیں اب تک کیا سے کیا ہوچکا ہوتا ،نواز شریف ،شہباز شریف ،آصف زرداری ،مریم نواز اور مجھ سمیت سیاستدانوں کو عدالت عظمیٰ سے یہ حسن سلوک کیوں نہیں ملا ؟ ایک گفتگو منظر عام پر آئی ہے ، ایک وکیل کسی بندے کو بتا رہے ہیں کہ فیصلہ یہ آنا ہے ، انہوں نے تو پیر منگل کو جو ہونے والا ہے وہ بھی بتایا ہے ۔وہ جمعرات کو پی ٹی وی ہیڈکوارٹر میں پریس کانفرنس سے خطاب کر رہے تھے ۔
وزیر دفاع خواجہ محمد آصف نے کہا کہ نیب ترامیم کا سب سے پہلا بینفشری عمران خان ہوا ہے، ہمارے دور میں 90 دن کا جسمانی ریمانڈ تھا ، ان دنوں کسی کو خیال نہیں آیا کہ ہماری حراست بھی ختم کر دی جائے ، اب تو ریسٹ ہائوس میں سہولیات کا بھی پوچھا جاتا ہے ،یہ اس ملک میں دو معیار کیوں ہیں ،عام زندگی، قانون ،آئین ،ہر کسی کے دو معیار ہیں ۔ انہوں نے کہا کہ وہ کہتے ہیں مجھے ڈنڈے مارے گئے مجھے کوئی چیز یاد نہیں ہے ، یاد داشت اسی طرح ہے کہ جب چاہیے غائب ہو گئی اور جب چاہا واپس آگئی ۔
انہوں نے کہاکہ پولیس حراست میں عمران خان کے میڈیکل اور خیراتی ہسپتال کے میڈیکل میں زمین آسمان کا فرق ہے، اس میڈیکل میں اور پولیس میڈیکل رپورٹ میں زخموں کی نوعیت اور ہے ،قوم کو کب تک بے وقوف بنایا جائے گا ۔ انہوں نے کہا کہ آج بھی عمران خان سپریم کورٹ کی راہداری میں خود چل کر گئے ہیں، نہ ویل چیئر کی ضرورت پڑی اور نہ ہی ظاہر ہورہا تھا کہ ان کی ٹانگ زخمی ہے یا تکلیف ہے ۔
انہوں نے کہا کہ ترتشد د مظاہروں سے اظہار لاتعلقی کر رہے ہیں ،گرفتاری سے پہلے انہوں نے اپنے آخری ویڈیو بیان میں ورکرز کو تشدد کے لئے نہیں اکسایا ؟ اس تشد د کا کیا نتیجہ لیا ، شہدا کی یادگاروں، دفاعی تنصیبات ،کورکمانڈر کے گھر پر حملے ہوئے ،اس پر عدلیہ کے اندر تشویش کی لہر نہیں ڈوری ، عدالتوں نے اس کا ازخود نوٹس نہیں لیا ۔
انہوں نے کہا کہ محمد نواز شریف، آصف علی زرداری ، ان کی ہمشیرہ ، مریم نواز ، میں اور شہباز شریف کسی ریسٹ ہائوس میں نہیں رہے ، ہمیں تو گھر سے کھانا منگوانے کے لئے عدالتوں میں جانا پڑتا تھا ،یہاں عدالت عظمیٰ نے یقین دہانی کرائی کہ تمام سہولیات دی جائیں اور 10 بندے بھی انھیں ملیں ۔ وزیر دفاع خواجہ محمد آصف نے کہا کہ ایک سوال ہے کہ یہ دوہرا معیار کیوں ہیں ، پنجاب اور کے پی کے کے اندر جس طرح کا گھیرائو جلائو اور جو زبان استعمال کی گئی ہے وہ کسی سے چھپی ہوئی نہیں ہے ۔
انہوں نے کہا کہ کیا یہ ملکی سالمیت پر حملہ نہیں ہے ،ملک دشمنی نہیں ہے؟اس پر ازخود نوٹس نہیں بنتا تھا ؟ انہوں نے کہا کہ دیکھتے ہیں کہ آنے والے دنوں میں کس طرح حالات کروٹ لیتے ہیں لیکن ایک گفتگو منظر عام پر آئی ہے ، ایک وکیل کسی بندے کو بتا رہے ہیں کہ فیصلہ یہ آنا ہے ، انہوں نے تو پیر منگل کو جو ہونے والا ہے وہ بھی بتایا ہے ۔ انہوں نے کہا کہ پی ٹی آئی کے سپوٹرز نے پہلے بھی پارلیمنٹ، پی ٹی وی پر حملہ کیا ،یہ رویہ ہے عین اسی طرح اس مرتبہ بھی ریڈیو پاکستان اور اے پی پی پر حملے ہوئے ہیں ۔
انہوں نے کہا کہ جی ایچ کیو پر تحریک طالبان کے بعد تحریک انصاف نے حملہ کیا ہے ،ا گر کسی اور پارٹی یا تنظیم نے اس طرح کیا ہوتا تو پتہ نہیں اب تک کیا سے کیا ہوچکا ہوتا ۔ انہوں نے کہا کہ ہماری مرتبہ نہ ازخود نوٹس ہوتا تھا اور نہ ہی انصاف کی حس جاگتی تھی ۔ ایک سوا ل کے جواب میں وزیر دفاع خواجہ محمد آصف نے کہا کہ ابھی تک کابینہ نے ایمرجنسی لگانے کا فیصلہ نہیں کیا اگر حالات ایسے ہوئےتو کابینہ کی منظوری سے ایمرجنسی لگ سکتی ہے ۔ایک سوال کے جواب میں انہوں نے کہاکہ مارشل لا کا کوئی چانس نہیں ہے، لاہور میں اور بھی شخصیات کے گھر تھے لیکن کورکمانڈر کے گھر کو ہدف بنایا گیا ہے ۔
انہوں نے کہا کہ ہم نے فوجی ڈکٹیٹر کے خلاف تقاریر کیں لیکن ادارے پر کبھی اس طرح کے حملے نہیں کیے ، عمران خان شخصیت پر نہیں بلکہ فوج کے ادارے کو ہدف بنا رہا ہے ۔ ایک سوال کے جواب میں انہوں نے کہا کہ موجودہ حالات میں پوری عوام متاثر ہورہی ہے ،پی ٹی آئی کے ساتھ مذاکرات ہو رہے تھے لیکن مذاکرات میں ڈکٹیشن نہیں چلتی ۔انہوں نے کہا کہ ان مشکل صورتحال سے نکلنے کا ایک ہی حل ایک دن الیکشن ہیں ، ہم نے کسی کو نہیں کہا کہ اسمبلیاں توڑیں ۔
وزیر دفاع خواجہ محمد آصف نے کہا کہ عمران خان کے ہر قدم پر تضاد ہے ،ہمارے کسی معاملے میں ایسا نہیں ہے ۔ انہوں نے کہا کہ سوشل میڈیا سے حملہ کرنے والوں کی شناخت ہوئی ہے جو ہدایات دے رہے ہیں کر رہے ہیں ان کی شناخت ہوچکی ہے ۔ایک سوال کے جواب میں انہوں نے کہا کہ موجودہ صورتحال کو صرف نظر کرنے کی ہمیں ہی کیوں تلقین کی جارہی ہے ۔ہم نے تو بدامنی نہیں پھیلائی یا کسی کو یہ نہیں کہا کہ ریاست کے خلاف بغاوت کرے اور ملک دشمنی کا ثبوت دیں ۔
انہوں نے کہا کہ بھارتی میڈیا یہ چلا رہا ہے کہ جو ہم 75 سال میں حاصل نہیں کرسکے وہ پاکستان کی ایک سیاسی جماعت کر گئی ہے ،یہ پاکستانی سیاسی عناصر ایسی بات سوچ بھی نہیں سکتے ۔انہوں نے کہا کہ ابھی جو کہہ رہا ہے کہ تشد د کا نہیں کہا لیکن زمان پارک سے پرتشدد سرگرمیاں کی گئیں اور انہی لوگوں نے ملک کے مختلف حصوں میں حملے کیے ، اس جماعت میں ایسے لوگ شامل ہوچکے ہیں جو ملک دشمنی کے ایجنڈے کو آگے بڑھا رہے ہیں ۔
انہوں نے کہا کہ یہ کیسا لیڈر ہے جو زکوٰۃ کے پیسے کھا جاتا ہے ۔ اس موقع پر وزیر دفاع خواجہ محمد آصف نے سوشل میڈیا پر وائرل ہونے والی عمران خان اور مسرت جمشید چیمہ کے درمیان مبینہ آڈیو گفتگو بھی میڈیا کو سنائی۔
Short Link: https://urdu.app.com.pk/urdu/?p=363108
