فیصل آباد۔ 05 مارچ (اے پی پی):محکمہ زراعت نے باغبانوں و کاشتکاروں کو جامن کے پودوں کیلئے کھاد کا متناسب استعمال کرنے کی ہدایت کی ہے اور کہاہے کہ آج کل جامن کے پودوں کی افزائش نسل تیزی سے جاری ہے لہٰذا مذکورہ افزائش نسل کو مزید سودمند بنانے کیلئے پودوں کو فوری متناسب کھاد فراہم کی جائے تاکہ بروقت اور کھادوں کے موزوں استعمال سے جامن کے پودے کی اچھی بڑھوتری یقینی ہو سکے۔
ڈپٹی ڈائریکٹرمحکمہ زراعت توسیع فیصل آبادعدیل احمدنے بتایاکہ جامن کے چھوٹے پودوں کو گوبر کی 20سے 30کلوگرام گلی سڑی کھاد فی پودا جبکہ بڑے پودوں کو 50سے 55کلوگرام گوبر کی گلی سڑی کھاد فی پودا ڈالنے کے بہترین نتائج حاصل ہو سکتے ہیں۔ انہوں نے کہاکہ جامن کے چھوٹے پودوں کو ایک پاؤ یوریا، ایک پاؤ ڈی اے پی، آدھا کلو گرام ایس او پی کھاد ڈالنی ضروری ہے۔
انہوں نے کہاکہ بڑے پودوں کیلئے یہ مقدار 3پاؤ یوریا، 3پاؤ ڈی اے پی، 3پاؤ ایس او پی فی پودا بھی پھل آنے سے قبل ڈالنے کے بہترین نتائج حاصل ہو سکتے ہیں۔ انہوں نے کہاکہ اس ضمن میں مزید رہنمائی کیلئے محکمہ زراعت کے فیلڈ سٹاف سے بھی رابطہ کیاجا سکتاہے۔
Short Link: https://urdu.app.com.pk/urdu/?p=568897
