اسلام آباد۔28اگست (اے پی پی):وفاقی وزیر برائے امور کشمیر، گلگت بلتستان و سیفران انجینئر امیر مقام نے حالیہ دنوں میں گلیشیئر پھٹنے کے باعث شدید تباہی کے شکار ضلع غذر کے متاثرہ علاقے تالی داس کا دورہ کیا ، گوپس کے مقام تالی داس میں گلیشیئر پھٹنے سے پانی نے جھیل کی شکل اختیار کر لی ہے۔ وزارت امور کشمیر ، گلگت بلتستان و سیفران کے مطابق وفاقی وزیر انجینئر امیر مقام نے متاثرین کیلئے قائم کیمپ کا دورہ کیا، متاثرہ خاندانوں سے ملاقات کی اور ان سے اظہارِ ہمدردی کرتے ہوئے کہا کہ وفاقی حکومت ان کے ساتھ کھڑی ہے۔
انہوں نے متاثرین سے خطاب کرتے ہوئے کہا کہ زمینی رابطہ بحال کرنے کیلئے فوری اقدامات کی ہدایات جاری کر دی گئی ہیں۔وفاقی وزیر انجینئر امیر مقام نے پاکستان ٹیلی کمیونیکیشن اتھارٹی کو سیلاب سے متاثرہ علاقوں میں موبائل نیٹ ورک بحال کرنے کی بھی ہدایت کی۔انہوں نے کہا کہ وزیراعظم محمد شہباز شریف کی واضح ہدایت ہے کہ متاثرہ افراد تک پہنچنے اور علاقے میں معمولات زندگی بحال کرنے کے لئے کوئی کسر نہ چھوڑی جائے،وفاقی حکومت اس مشکل وقت میں گلگت بلتستان کے عوام کے شانہ بشانہ کھڑی ہے۔ وفاقی وزیر نے کہا کہ سیلاب کی تباہ کاریوں کے نتیجے میں جو لوگ جاں بحق ہوئے ہیں ان کے لواحقین کو آج ہی 20، 20 لاکھ روپے کے مالی امدادی چیکس دیئے جائیں گے۔
انہوں نے متاثرہ خاندانوں کیلئے دعا کرتے ہوئے یقین دہانی کرائی کہ حکومت ان کے ساتھ ہر ممکن تعاون جاری رکھے گی۔ متاثرین نے اس موقع پر وفاقی وزیر کا شکریہ ادا کیا کہ وہ اس مشکل وقت میں ان کے درمیان موجود ہیں اور ان کے دکھ درد میں شریک ہوئے۔انجینئر امیر مقام نے کہا کہ سیلاب کے باعث کئی مکانات ڈوب چکے ہیں اور متاثرین کو نئی جگہ پر ری ایلوکیشن (نقل مکانی) کیلئے ٹھوس اقدامات کئے جائیں گے تاکہ ان کی زندگی دوبارہ معمول پر آ سکے۔انہوں نے یقین دلایا کہ متاثرہ علاقوں کی بحالی، بنیادی سہولیات کی فراہمی اور متاثرین کی دوبارہ آبادکاری کیلئے وفاقی حکومت ہر ممکن قدم اٹھائے گی۔جی بی ڈی ایم اے کےحکام کی جانب سے غذر میں سیلاب کی تباہ کاریوں اور بحالی کے کاموں کے حوالے سے بریفنگ دی گئی۔
واضح رہے کہ نالہ راوشن میں گلیشیئر پھٹنے سے شدید لینڈ سلائیڈنگ ہوئی ،لینڈ سلائیڈنگ کی اطلاع ایک چرواہے نے کال کرکے دی تو لوگ بروقت محفوظ مقامات پر منتقل ہوئے جس کے نتیجے میں کوئی جانی نقصان نہیں ہوا،لینڈ سلائیڈنگ اور جھیل کی زد میں آکر گلگت شندور روڈ کاایک کلومیٹر حصہ بھی تباہ ہوگیا اور گوپس یاسین کے سب ڈویژن یاسین ، پھں نڈر اور گوپس کا زمینی رابطہ گاہکوچ اور گلگت سے منقطع ہوگیا۔
اس موقع پر وفاقی سیکرٹری امور کشمیر، گلگت بلتستان و سیفران ظفر حسن کے علاوہ سابق وزیراعلیٰ گلگت بلتستان حافظ الرحمن، ڈائریکٹر جنرل جی بی ڈی ایم اے ذاکر حسین، ہوم سیکرٹری علی اصغر، کمشنر گلگت ڈویژن اسد ہارون، ڈی سی غذر ،اے ڈی سی گوپس یاسین کے علاوہ اعلیٰ حکام بھی موجود تھے۔ دورہ کے دوران سپیکر گلگت بلتستان اسمبلی نظیر احمد ایڈووکیٹ ، سینئر صوبائی وزیر سیاحت غلام محمد اور مسلم لیگ (ن )کے مختلف عہدیداران بھی وفاقی وزیر کے ہمراہ تھے ۔ واضح رہے کہ وفاقی وزیر انجینئر امیر مقام وزیراعظم محمد شہباز شریف کی خصوصی ہدایات پر گلگت بلتستان کے تین روزہ دورے پر ہیں۔
