ابوظہبی۔25مارچ (اے پی پی):متحدہ عرب امارات کے مرکزی بینک (سی بی یو اے ای) نے 100 درہم کے نئے کرنسی نوٹ کا اجرا کر دیاہے۔امارات نیوز ایجنسی وام کے مطابق متحدہ عرب امارات نے جدید سیکیورٹی فیچرز پر مبنی نیا 100 درہم کا کرنسی نوٹ جاری کر دیا جو پالیمر مواد سے تیار کیا گیا ہے اور جدید ترین ڈیزائن و سیکیورٹی خصوصیات سے مزین ہے۔
اس اقدام کا مقصد پائیداری کو فروغ دینا اور جدید مالیاتی نظام کی جانب ایک اور قدم بڑھانا ہے۔یہ نیا نوٹ قومی کرنسی کے تیسرے اجراء کا حصہ ہے جس کا ڈیزائن متحدہ عرب امارات کی ترقی، ثقافتی ورثے اور عالمی اقتصادی مرکز کے طور پر اس کی کامیابیوں کو اجاگر کرتا ہے۔نئے نوٹ کو سرخ رنگ کے مختلف شیڈز میں تیار کیا گیا ہے تاکہ عوام اسے آسانی سے موجودہ نوٹ سے پہچان سکیں۔ اس پر متحدہ عرب امارات کا نیشنل برانڈ اور جدید پرنٹنگ ٹیکنالوجی سے تیار کردہ خاکے اور تحریریں شامل ہیں۔
نوٹ کے سامنے کی جانب اُم القیوین کا تاریخی قلعہ دکھایا گیا ہے جو ملک کے ثقافتی ورثے کی نمائندگی کرتا ہے۔ پچھلے رخ پر فجیرہ پورٹ اور اتحاد ریل کی تصاویر موجود ہیں جو متحدہ عرب امارات کی جدید انفرااسٹرکچر اور اقتصادی ترقی کی عکاس ہیں۔نئے نوٹ میں ’سپارک فلو دائریکشن‘ اور’ کائن گرام کلر‘جیسی جدید ٹیکنالوجی کا استعمال کیا گیا ہے تاکہ جعلی نوٹوں کی روک تھام ممکن ہو، نوٹ پر بریل علامات بھی شامل کی گئی ہیں تاکہ بصارت سے محروم افراد بھی اس کی مالیت آسانی سے شناخت کر سکیں۔
پالیمر سے تیار کردہ یہ نوٹ کاغذی نوٹ کے مقابلے میں دو گنا زیادہ دیر تک گردش میں رہ سکتے ہیں جو انہیں ماحول دوست اور کم خرچ بناتا ہے۔مرکزی بینک کے مطابق نیا نوٹ 24 مارچ 2025 سے گردش میں آ چکا ہے اور یہ موجودہ 100 درہم کے نوٹ کے ساتھ قانونی حیثیت رکھتا ہے۔ بینکوں اور ایکسچینج ہاؤسز کو ہدایت کی گئی ہے کہ وہ اپنی اے ٹی ایم مشینیں اور نوٹ گننے والی مشینیں اپڈیٹ کریں تاکہ نیا نوٹ با آسانی قبول کیا جا سکے۔
مرکزی بینک کے گورنر خالد محمد بالعمہ نے اس موقع پر کہا کہ نیا نوٹ امارات کی پائیدار ترقی اور مالیاتی مسابقت کی عکاسی کرتا ہے۔ انہوں نے بتایا کہ اس کا ڈیزائن ہماری تاریخی اقدار کو خراجِ تحسین پیش کرنے کے ساتھ ساتھ مستقبل کی ترقی کے لیے ہماری امنگوں کی نمائندگی بھی کرتا ہے۔
Short Link: https://urdu.app.com.pk/urdu/?p=576134
