غزہ۔13جنوری (اے پی پی):متحدہ عرب امارات کی تین امدادی قافلے غزہ کی پٹی میں داخل ہو گئے۔امارات نیوز ایجنسی وام کے مطابق اس ہفتے متحدہ عرب امارات کے تین امدادی قافلے مصر کے رفح بارڈر کراسنگ کے ذریعے غزہ کی پٹی میں داخل ہوئے، جو فلسطینی عوام کی حمایت کے لیے ’آپریشن الفارس الشهم 3‘ کے تحت فراہم کیے گئے۔ان قافلوں میں 35 ٹرک شامل تھے، جن میں 248.9 ٹن سے زائد امدادی سامان موجود تھا۔ اس میں 100 ٹن سے زائد طبی سامان شامل تھا، جن میں ڈائلیسز مشینیں، الٹراساونڈ ڈیوائسز، بحالی کے آلات، وہیل چیئرز، سانس لینے کے ماسک، طبی استعمال کے سامان، اور مختلف قسم کی دوائیاں شامل تھیں۔
اس کے علاوہ خوراک، پناہ کے لیے خیمے، آٹا، اور دیگر ضروری اشیاء بھی امداد کا حصہ تھیں۔’آپریشن الفارس الشهم 3‘ کے تحت غزہ کی پٹی میں داخل ہونے والے امدادی کافلوں کی مجموعی تعداد 153 تک پہنچ گئی ہے، جو 2,391 ٹرکوں پر مشتمل ہیں۔ اب تک اس آپریشن کے تحت فلسطینی عوام کو 29,274 ٹن سے زائد امداد فراہم کی جا چکی ہے، جس سے خاص طور پر غزہ میں سب سے زیادہ متاثرہ گروہوں کی مشکلات کو کم کرنے میں مدد ملی ہے۔آپریشن کے نمائندے فاضل بن ارحمہ الشامسی نے بتایا کہ اس ہفتے 100 ٹن سے زائد دوائیں، طبی آلات، اور دیگر طبی سامان لے جانے والے کئی امدادی قافلے روانہ کیے گئے۔
