دبئی ۔11مئی (اے پی پی):متحدہ عرب امارات کے الضفرہ ایئربیس پر سعودی عرب اور دیگر دوست و برادر ممالک کی مشترکہ فضائی مشقیں’ڈیزرٹ فلیگ 2025 ‘ اختتام پذیر ہو گئیں۔
ایس پی اے،کے مطابق مشترکہ مشقوں کے اختتام پر فضائی گروپ کے کمانڈر لیفٹیننٹ کرنل فیصل المروانی نے میڈیا سے گفتگو میں بتایا کہ مشقوں کا مقصد بدلتے حالات کے تقاضوں کو مدنظر رکھتے ہوئے آپریشنل پلان ترتیب دینا اور عصرِ حاضر کے مطابق اپنی فورسز کو تیار کرنا ہے تاکہ جوان کیسے بھی حالات کے لیے خود کو تیار رکھیں۔
انہوں نے مزید کہا کہ مشقوں کے شروع ہونے سے قبل جو اہداف مقرر کیے گئے تھے انہیں حاصل کیا گیا جن میں فضائیہ کے گراونڈ کنٹرول یونٹ کے علاوہ ٹیکنیکل سپورٹ اور دیگر یونٹس میں باہمی تعاون کو منظم کرنا شامل تھا۔
’مشترکہ مشقوں میں فضائیہ کے یونٹس نے متعدد ایئرآپریشنز کیے جن میں حملہ ، دفاع ، ریسکیو اور رات کی تاریکی میں ایئرری فیولنگ شامل تھا۔لیفٹیننٹ کرنل فیصل المروانی نے بتایا کہ مشقوں سے قبل ہر قسم کی احتیاطی تدابیر اختیار کی گئی تھی جبکہ مشقوں کا منظرنامہ حقیقت سے قریب تر تھا۔
Short Link: https://urdu.app.com.pk/urdu/?p=595534
