واشنگٹن ڈی سی۔11جون (اے پی پی):متحدہ عرب امارات کے نائب وزیر اعظم اور وزیر خارجہ شیخ عبداللہ بن زاید النہیان نے امریکی وزیر خارجہ مارکو روبیو سے ملاقات کی ۔امارات نیوز ایجنسی وام کے مطابق متحدہ عرب امارات کے نائب وزیر اعظم اور وزیر خارجہ شیخ عبداللہ بن زاید النہیان نے واشنگٹن ڈی سی کے دورے کے دوران امریکی وزیر خارجہ مارکو روبیو سے ملاقات کی۔امریکی محکمہ خارجہ کے صدر دفتر میں ہونے والی اس ملاقات میں دونوں ممالک کے درمیان سٹریٹجک تعلقات اور باہمی دلچسپی کے شعبوں میں ان کے فروغ پر تبادلہ خیال کیا گیا۔ مارکو روبیو نے شیخ عبداللہ بن زاید اور ان کے ہمراہ وفد کے دورے کا خیرمقدم کیا۔
ملاقات کے دوران اقتصادی، تجارتی، سائنسی، جدید ٹیکنالوجی اور مصنوعی ذہانت جیسے ترقیاتی شعبوں میں دو طرفہ تعاون کے امکانات کا جائزہ لیا گیا۔ملاقات میں گزشتہ ماہ امریکی صدر ڈونلڈ ٹرمپ کے دورہ امارات کا بھی حوالہ دیا گیا، جسے دونوں جانب سے باہمی تعلقات کی مضبوطی کا مظہر قرار دیا گیا۔ فریقین نے اس بات پر اتفاق کیا کہ یہ دورہ دونوں ممالک کے درمیان تعاون کو مزید گہرا اور شراکت داری کو ہر سطح پر وسعت دینے میں معاون ثابت ہوا۔شیخ عبداللہ بن زاید نے متحدہ عرب امارات اور امریکا کے درمیان طویل المدتی سٹریٹجک شراکت داری کو سراہتے ہوئے کہا کہ امریکا امارات کا ایک کلیدی سٹریٹجک حلیف ہے۔
انہوں نے اس بات کا اعادہ کیا کہ امارات امریکاکے ساتھ مل کر کام کرنے کے لیے پُرعزم ہے تاکہ دونوں اقوام اور عوام کے لیے مزید خوشحالی اور پائیدار ترقی کو ممکن بنایا جا سکے۔مزید برآں، ملاقات میں خطے کی مجموعی صورتحال پر بھی گفتگو ہوئی۔ اس موقع پر شیخ عبداللہ نے اس عزم کا اظہار کیا کہ متحدہ عرب امارات امریکا اور بین الاقوامی و علاقائی شراکت داروں کے ساتھ مل کر امن و استحکام کے فروغ اور بقائے باہمی اور انسانی اخوت کی اقدار کو فروغ دینے کے لیے پرعزم ہے۔
ملاقات میں امارات کے سفیر برائے امریکا یوسف العتیبہ، سیاسی امور کی معاون وزیر لانا زکی نسیبہ، اقتصادی و تجارتی امور کے معاون وزیر سعید مبارک الہاجری اور وزارت خارجہ میں میڈیکل افیئرز و لائف سائنسز کی معاون وزیر ڈاکٹر مہا تیسیر برکات بھی شریک تھیں۔
