لندن ۔26اکتوبر (اے پی پی):متحدہ عرب امارات کے نائب وزیر اعظم و وزیرخارجہ شیخ عبداللہ بن زاید آل نہیان نے لندن میں امریکی ہم منصب انٹونی بلنکن سے ملاقات کی ۔ اردو نیوز کے مطابق ملاقات کے دوران دونوں ممالک کے درمیان دوستانہ تعلقات اور سٹریٹجک شراکت داری پر تبادلہ خیال کیا گیا۔اس موقع پر دونوں وزرائے خارجہ نے گزشتہ ماہ ہونے والے اماراتی صدر کے دورہ امریکا کی اہمیت کو اجاگر کیا۔
ملاقات میں باہمی تشویش کے علاقائی اور بین الاقوامی امور پر بھی تبادلہ خیال کیا گیا جن میں سب سے اہم مشرق وسطی کی حالیہ صورتحال اور غزہ میں انسانی بحران اور لبنان کے واقعات شامل ہیں۔انہوں نے جنگ بندی تک پہنچنے اور تمام شہریوں کےتحفظ کو یقینی بنانے کےلیے کوششیں تیز کرنے کی اہمیت پر بھی زور دیا۔
اس موقع پر سیاسی امور کی معاون وزیرخارجہ لانا ذکی نسیبۃ اور اقتصادی و تجارتی امور کے وزیر سعید مبارک الحجری بھی موجود تھے۔
Short Link: https://urdu.app.com.pk/urdu/?p=517165
