محسن نقوی ایشین گیمز کرکٹ کے فائنل میں شرکت نہیں کریں گے،ترجمان اے سی سی

لاہور۔2اکتوبر (اے پی پی):ایشین کرکٹ کونسل (اے سی سی) کے صدر محسن نقوی ایشین گیمز میں کرکٹ کے فائنل میں شرکت نہیں کریں گے۔ایشین کرکٹ کونسل کی جانب سے جاری پریس ریلیز میں بتایا گیا ہے کہ محسن نقوی پہلے سے طے شدہ مصروفیات اور کمٹمنٹس کے باعث ایشین گیمز کے کرکٹ ایونٹ کے فائنل ڈے پر موجود نہیں ہوں گے۔

اے سی سی کے مطابق صدر محسن نقوی نے ایشین گیمز میں شریک تمام ٹیموں، بالخصوص میڈلز حاصل کرنے والی ٹیموں کے لیے نیک خواہشات کا اظہار کیا ہے۔

انہوں نے ایشین گیمز کے کرکٹ مقابلوں میں شریک کھلاڑیوں اور ٹیموں کے لیے کامیابی کی دعا بھی کی۔ایشین گیمز کے کرکٹ ایونٹ میں روایتی حریف پاکستان اور بھارت کی ٹیمیں گولڈ میڈل کے لیے کل ہفتہ کے روز مدمقابل ہوں گی۔ دونوں ٹیموں کے درمیان فائنل میچ صبح ساڑھے 9 بجے شروع ہوگا، جس میں ایشین گیمز کے کرکٹ مقابلوں کا گولڈ میڈل دا ئوپر ہوگا۔فائنل سے قبل کانسی کے تمغے کے لیے بنگلادیش اور سری لنکا کی ٹیمیں آمنے سامنے ہوں گی۔

دونوں ٹیموں کے درمیان برائونز میڈل کا میچ صبح 5 بجے کھیلا جائے گا۔یوں ایشین گیمز کے کرکٹ ایونٹ کا آخری روز شائقین کے لیے خاص اہمیت کا حامل ہوگا، جہاں پہلے برائونز میڈل کے لیے بنگلادیش اور سری لنکا جبکہ اس کے بعد گولڈ میڈل کے لیے پاکستان اور بھارت کی ٹیمیں میدان میں اتریں گی۔