ڈھاکہ۔24جولائی (اے پی پی):ایشین کرکٹ کونسل (اے سی سی) کے صدر محسن نقوی نے کہا ہے کہ وہ بنگلہ دیش میں حالیہ فضائی حادثے میں 31 قیمتی انسانی جانوں کے ضیاع پر گہرے دکھ اور افسوس کا اظہار کرتے ہیں۔ ان خیالات کا اظہار انہوں نے ڈھاکہ میں اے سی سی ممبران کے اعزاز میں منعقدہ ایک خصوصی تقریب سے خطاب کرتے ہوئے کیا۔ انہوں نے کہا کہ وہ المناک فضائی حادثے میں جاں بحق افراد کے لواحقین، بنگلہ دیش کی حکومت اور عوام سے دلی ہمدردی اور تعزیت کا اظہار کرتے ہیں۔
ہماری دعائیں اور ہمدردیاں متاثرہ خاندانوں کے ساتھ ہیں۔ محسن نقوی نے بنگلہ دیش کرکٹ بورڈ کو حالیہ سیریز میں کامیابی پر مبارکباد بھی پیش کی۔ انہوں نے اس بات پر خوشی کا اظہار کیا کہ ایشین کرکٹ کونسل کا سالانہ جنرل اجلاس پہلی مرتبہ بنگلہ دیش میں منعقد ہو رہا ہے اور بیشتر ممبران اس وقت ڈھاکہ میں موجود ہیں۔
محسن نقوی نے بنگلہ دیش کرکٹ بورڈ کے چیئرمین امین السلام کا بہترین انتظامات اور مہمان نوازی پر شکریہ ادا کیا اور سالانہ اجلاس میں شرکت کرنے والے تمام ممبرز کا بھی تہہ دل سے شکریہ ادا کیا۔ انہوں نے کہا کہ ہمیں ایک ٹیم کی طرح کام کرنا ہے۔ تمام سیاسی اختلافات کو ایک طرف رکھ کر صرف اور صرف کرکٹ کے فروغ کے لیے یکجا ہونا ہے۔
ان کا کہنا تھا کہ ہمیں ایک دوسرے کو مضبوط بنانا ہے اور پوری امید ہے کہ ہم سب مل کر یہ ہدف حاصل کر سکتے ہیں۔ ہماری خواہش ہے کہ تمام ایسوسی ایٹ ممبران کی ٹیمیں مضبوط ہوں۔ انہوں نے یقین دہانی کرائی کہ بطور صدر ایشین کرکٹ کونسل وہ ہر ممکن اقدام کریں گے تاکہ یہ ادارہ ایشیا میں کرکٹ کا سب سے طاقتور ادارہ بن سکے۔ محسن نقوی نے اس عزم کا اعادہ کیا کہ کرکٹ کو ان ایشیائی ممالک تک پھیلانا ہے جہاں یہ کھیل ابھی فروغ نہیں پا سکا اور یہ کام ہمیں بطور ایک ٹیم، مل کر کرنا ہو گا۔
