مانچسٹر۔ 31اگست (اے پی پی) پاکستان کرکٹ ٹیم کے مایہ ناز آل راؤنڈر محمد حفیظ نے انٹرنیشنل مینز ٹی ٹونٹی کرکٹ میں 2000 رنز مکمل کرلئے ہیں۔ انہوں نے یہ اعزاز مانچسٹر کے مقام پر انگلینڈ کے خلاف تین میچوں کی سیریز کے دوسرے میچ میں حاصل کیا۔ وہ 2000 رنز اور 50 سے زائد وکٹیں حاصل کرنے والے پہلے کھلاڑی بن گئے۔ 39 سالہ محمد حفیظ گزشتہ روز93 ویں ٹی ٹونٹی انٹرنیشنل میچ کھیلنے میدان میں اترے تو اننگز کے دوران ثاقب محمود کو چھکا لگاکر اپنے ٹی ٹونٹی کیرئیر کے 2000 رنز مکمل کرلئے ۔ وہ یہ کارنامہ سرانجام دینے والے دوسرے پاکستانی اور مجموعی طور پر 9 ویں بلے باز ہیں۔ ان سے قبل پاکستان کے شعیب ملک بھی 2000 ٹی ٹونٹی انٹرنیشنل رنز بنا چکے ہیں لیکن محمد حفیظ نے دو ہزار رنز مکمل کرتے ہی منفرد اعزاز بھی اپنے نام کرلیا۔ وہ بطور آل راؤنڈر مینز ٹی ٹونٹی انٹرنیشنل میں 50 وکٹیں اور 2000 رنز مکمل کرنے والے پہلے کرکٹر بن گئے ہیں۔ ٹی ٹونٹی کرکٹ میں ان کا بہترین سکور 86 رنز ہے، انہوں نے 12 نصف سنچریاں سکور کر رکھی ہیں۔
Short Link: https://urdu.app.com.pk/urdu/?p=214283
