لاہور۔12فروری (اے پی پی):پاکستان مسلم لیگ (ن)کے صدر محمد نواز شریف اور وزیراعلی پنجاب مریم نوازشریف سے بدھ کے روز یہاں پنجاب اسمبلی کے اراکین نے ملاقات کی ،ننکانہ صاحب، شیخو پورہ، قصور، اوکاڑہ اور پاکپتن ڈویژن سے تعلق رکھنے والے ارکان پنجاب اسمبلی ملاقات کرنے والوں میں شامل تھے۔
اس موقع پر گفتگو کرتے ہو ئے محمد نواز شریف نے کہا کہ موجودہ حکومت نے زوال کا رخ ترقی کی طرف موڑ دیا ہے،معاشی اشاریوں کی بہتری پاکستان کی بہتری ہے، مسلم لیگ ن کے سابقہ ادوار کی طرح ایک با ر پھرمعیشت میں بہتری لا کر پاکستان سنوار رہے ہیں۔ انہوں نے کہا کہ پالیسی ریٹ میں کمی سے ملک میں معاشی سرگرمیاں بڑھ رہی ہیں،معیشت کو فائدہ ہو رہا ہے،روپیہ مستحکم ہوا اور گروتھ بڑھ رہی ہے،سٹاک ایکسچینج بلند ترین سطح پر پہنچ چکی ہے،مہنگائی میں نمایاں کمی ہو رہی ہے۔
انہوں نے کہا کہ مسلم لیگ ن نے پاکستان میں جمہوریت کے استحکام کے لئے بے شمار قربانیاں دیں اورآگے بھی ایسی قربانیاں دینے سے دریغ نہیں کریں گے، پاکستان کو ترقی کی راہ پر گامزن کرنے کیلئے وزیر اعظم محمد شہباز شریف کی مدبرانہ سوچ اور محنت رنگ لا رہی ہے، آئی ایم ایف نے بھی معاشی بحالی اور پاکستان کے ترقی کی طرف بڑھنے کا اعتراف کیا ہے۔
محمد نواز شریف نے کہا کہ وزیر اعلی مریم نواز کی قیادت میں پنجاب کی رونقیں اور خوشیاں بحال ہو رہی ہیں، اللہ نظر بد سے بچائے،اللہ تعالی کا شکر ادا کرتے ہیں پاکستان سیاہ اندھیروں سے باہر آ رہا ہے،مسلم لیگ (ن) نے پھر ثابت کیا کہ ہم ہی ملک کی خدمت کرتے ہیں، عوام کو ریلیف دیتے ہیں۔ ارکان اسمبلی نے گفتگو کرتے ہو ئے کہا کہ ہمیںفخر ہے کہ محمد نواز شریف اور وزیر اعظم محمد شہباز شریف ہمارے قائد ہیں جنہوں نے زخم کھائے لیکن ہمیشہ سیاست پر ریاست کے مفادات کو ترجیح دی،محمد نواز شریف پاکستان کی ترقی کی علامت اور ضمانت ہیں۔
انہوں نے کہا کہ ملک کی خوشحالی اور عوام کی بحالی کی بات آتی ہے تو صرف محمد نواز شریف کا نام آتا ہے،مریم نواز شریف جیسی مدبر اور محنتی وزیر اعلی کا ملنا پنجاب اور ہماری خوش قسمتی ہے،پہلی دفعہ سوئے ہوئے محکموں کو بھی کام پر لگا دیا گیا ہے،مریم نواز شریف نے بطور وزیر اعلی محمد نواز شریف اور محمدشہباز شریف کی ترقی کی روایت کو ایک نئی مثال بنا دیا ہے۔ ارکان اسمبلی نے کہا کہ قوم کی بیٹی وزیر اعلی مریم نوازدن رات عوام اور پنجاب کی خدمت کر رہی ہے،پاکستان اور پنجاب ترقی کر رہے ہیں، عوام کو تبدیلی نظر آ رہی ہے، ستھرا پنجاب سکیم پورے صوبے اور ہر ضلع میں صفائی کی مثال بن چکی ہے،پنجاب کے عوام خوش اور مطمئن ہیں، ترقیاتی کاموں کا معیار اور رفتار لائق تحسین ہے۔
ارکان اسمبلی نے وزیراعلی مریم نواز شریف کو خراج تحسین پیش کرتے ہو ئے کہا کہ جن محکموں کو سال ہا سال کوئی پیسہ نہیں ملتا تھا وہ بھی کام کر رہے ہیں،جنگلات، جنگلی حیات کا فروغ اور تحفظ، ماحولیاتی بہتری، شرمپس فارمنگ کا آغاز، لائیو سٹاک کی ترقی انقلابی اقدامات ہیں،ستھرا پنجاب، کسان کارڈ، ٹریکٹر اور جدید زرعی مشینری، سکالرشپ پروگرام کی فراہمی، سڑکوں کی تعمیر و بحالی،دھی رانی پروگرام، بنیادی و دیہی مراکز اور صحت کے پورے نظام کی اپ گریڈیشن بڑے اقدامات ہیں۔ وزیراعلی مریم نوازشریف نے اظہار خیال کرتے ہوئے کہا کہ عوام کی زندگی میں بہتری کا آنا ہی ہماری محنت کا صلہ ہے،محمد نواز شریف پاکستان کی ترقی کا برانڈ ہیں،ہماری پہچان اور شناخت نواز شریف ہیں۔دریں اثنا مسلم لیگ (ن)کے صدر محمد نواز شریف اور وزیراعلی مریم نواز کی زیر صدارت اجلاس منعقد ہوا،جس میں عوامی فلاح کے منصوبوں اور مستقبل کی سیاسی حکمت عملی پر مشاورت ہوئی۔اس موقع پرپارٹی کے سینئر رہنما سینیٹر پرویز رشید، رانا ثنا اللہ، پنجاب کی سینئر وزیر مریم اورنگزیب ،راشد نصر اللہ،سلطان باجوہ،رانا محمد ارشد، کاشف پدھیار، رانا سکندر حیات اور رانا اقبال خان سمیت دیگر بھی موجود تھے۔مسلم لیگ (ن)کے صدر محمد نواز شریف اور وزیراعلی پنجاب مریم نوازشریف سے جاوید علاوالدین ساجد، سید محمد عاشق حسین شاہ، چوہدری افتخار حسین چاچڑ، نور الامین وٹو، علی عباس، یاور زمان، میاں محمد منیر، چوہدری غلام رضا ربیرہ، فاروق احمد خان مانیکا، چوہدری جاوید احمد، عمران اکرم، ڈاکٹر فرخ جاوید اور سردار منصب علی ڈوگر بھی ملاقات کرنے والوں میں شامل تھے۔
Short Link: https://urdu.app.com.pk/urdu/?p=559713
