لاہور۔1ستمبر (اے پی پی):وزیر اطلاعات پنجاب عظمی بخاری نے کہا ہے کہ محمد نواز شریف پاکستانی قوم کی جان ،آن بان اور شان ہیں، وزیر اعظم محمد شہباز شریف نے پاکستان کو دیوالیہ ہونے سے بچایا، مریم نواز پنجاب کے عوام کی دن رات خدمت میں مصروف عمل ہے۔ان خیالات کااظہار انہوں نے اتوار کے روز پی ٹی آئی رہنما اسد قیصر کے بیان پر ردعمل دیتے ہوئے کیا۔ عظمی بخاری نے کہاکہ الحمدللہ محمد نواز شریف پاکستان واپس بھی آئے وفاق اور پنجاب میں حکومت بھی بنائی،
محمدنواز شریف اس قوم کی جان ہیں آن بان ہیں اور شان ہیں۔ انہوں نے کہا کہ محمد نواز شریف کے بھائی محمد شہباز شریف نے بطور وزیر اعظم پاکستان کو دیوالیہ ہونے سے بچایا جبکہ ان کی بیٹی مریم نواز بطور وزیر اعلی پنجاب کے عوام کی دن رات خدمت میں مصروف عمل ہیں، جو گھڑے پی ٹی آئی کا نالائق اور ناتجربہ کار لیڈر کھود کر گیا تھا محمد شہباز شریف ان کو پر کرنے کی کوشش کر رہے ہیں۔
عظمی بخاری نے کہا کہ محمدنواز شریف کے بغض میں پی ٹی آئی لوگ اندھے، بہرے اور گونگے ہو چکے ہیں، محمد نواز شریف ملک و قوم کی بات کرنے والے لیڈر ہیں جبکہ آپ کے لیڈر کی طرح ملک پر ایٹم بم گرانے کی خواہش کرنے والے لیڈر نہیں۔ عظمی بخاری نے مزید کہا کہ حلقے کھولنے کے طعنے دینے والے دوبارہ گنتی کے نام سے ایسے بھاگتے جیسے بندر غلیل سے بھاگتا ہے،
جیل میں آپ کے چور،بددیانت اور کرپٹ لیڈر ہیں لہذا مذاکرات اور پائوں پکڑنے کی ضرورت آپ کو ہے، ہمیں آپ سے بات کرنے یا آپ کا چہرہ دیکھنے کا بھی کوئی شوق نہیں۔
