محنتی اور دیانت دار ڈاکٹرز قابل فخر، مگر غفلت کسی صورت برداشت نہیں۔صوبائی وزیر اطلاعات پنجاب

لاہور۔10مارچ (اے پی پی):صوبائی وزیر اطلاعات پنجاب عظمی بخاری نے کہا ہے کہ ملک میں سیاسی مقاصد کے لیے سانحات کو استعمال کرنا ایک معمول بن چکا ہے۔وزیر اعلی پنجاب مریم نواز نے حال ہی میں میو ہسپتال کا دورہ کیا اور وہاں صحت کی سہولیات کا جائزہ لیا۔ پنجاب حکومت نے صحت کے بجٹ میں 500فیصد اضافہ کیا ہے جبکہ بنیادی صحت مراکز کو فعال کیا جا چکا ہے تاکہ عوام کو بہتر طبی سہولیات میسر آسکیں۔ انہوں نے اس بات پر زور دیا کہ ہسپتالوں کی انتظامیہ کی ذمہ داری ہے کہ حکومت کی طرف سے فراہم کردہ فنڈز کو عوامی فلاح کے لیے استعمال کرے۔ ان کا کہنا تھا کہ اللہ تعالی صرف وزیر اعلی سے نہیں بلکہ تمام متعلقہ ذمہ داران سے جواب لے گا۔

ان خیالات کا اظہار انہوں نے پنجاب اسمبلی میں پریس کانفرنس کرتے ہوئے کیا۔عظمی بخاری نے میو ہسپتال میں غلط انجکشن لگنے کے باعث دو مریضوں کی وفات پر دکھ کا اظہار کیا اور بتایا کہ وزیر اعلی پنجاب اس واقعے پر دلی طور پر رنجیدہ ہیں اور فوری طور پر ایکشن لیتے ہوئے ذمہ داران کے خلاف کارروائی کا حکم دیا ہے۔ وزیر اعلی نے ہسپتال کے ایم ایس اور سی ای او کو عہدے سے ہٹا دیا مگر اس فیصلے پر بے جا میڈیا ٹرائل کیا گیا۔انہوں نے مزید کہا کہ ہسپتالوں میں بنیادی ادویات کی عدم دستیابی کا معاملہ ناقابل قبول ہے۔

وزیر اعلی نے ایم ایس سے سوال کیا کہ مریضوں کو باہر سے ادویات کیوں خریدنی پڑ رہی ہیں جبکہ میو ہسپتال میں ایک ارب تینتیس کروڑ روپے کے فنڈز موجود ہیں؟ مزید برآں، ہسپتال میں 15کروڑ روپے ہیلتھ انشورنس کے لیے مختص کیے گئے ہیں، اس کے باوجود مریضوں کو مشکلات کا سامنا کرنا پڑ رہا ہے جو کہ غفلت کی انتہا ہے۔عظمی بخاری نے محکمہ صحت میں موجود انتظامی مسائل کی نشاندہی کرتے ہوئے کہا کہ اس کی کارکردگی کو بہتر بنانا وقت کی ضرورت ہے۔

انہوں نے کہا کہ پنجاب کے ڈاکٹرز انتہائی محنتی اور دیانت دار ہیں، تاہم اگر کوئی غفلت برتے گا تو اسے کسی صورت نظر انداز نہیں کیا جائے گا۔انہوں نے ڈاکٹرز کی جانب سے احتجاج اور ہڑتال کے رجحان پر تشویش کا اظہار کرتے ہوئے کہا کہ ایسے اقدامات عوام کے لیے مشکلات پیدا کرتے ہیں اور انہیں کسی طور زیب نہیں دیتے۔ انہوں نے مزید کہا کہ مریم نواز پنجاب کی پہلی وزیر اعلی ہیں جو خود ہسپتالوں کے دورے کرکے عوامی مسائل کا جائزہ لیتی ہیں مگر بدقسمتی سے ایم ایس کے استعفے سے متعلق بے بنیاد پروپیگنڈہ مہم چلائی گئی، جو کہ غیر ذمہ دارانہ طرزِ عمل ہے۔

صوبائی وزیر اطلاعات نے اس موقع پر واضح کیا کہ پنجاب حکومت عوام کو بہتر صحت کی سہولیات فراہم کرنے کے لیے ہر ممکن اقدامات کر رہی ہے اور کسی قسم کی کوتاہی برداشت نہیں کی جائے گی۔

Short Link: https://urdu.app.com.pk/urdu/?p=570815