لاہور۔4اپریل (اے پی پی):وزیراعلی پنجاب کے پریزن ریفارمز ایجنڈا کے تحت قیدیوں کی فلاح کیلئے محکمہ داخلہ پنجاب کا انقلابی اقدام، قیدیوں کی سزا میں معافی وبقیہ سزا کا تمام ریکارڈ آن لائن کر دیا۔ترجمان کے مطابق سیکرٹری داخلہ پنجاب نور الامین مینگل نے محکمہ داخلہ میں منعقدہ تقریب میں جدید سسٹم کا افتتاح کر دیا، پنجاب بھر میں موجود قیدیوں کے اہل خانہ اب صرف ایک ایس ایم ایس کے ذریعے قیدی کی رہائی کی تاریخ بارے جان سکتے ہیں، ان معلومات کے حصول کیلئے شہری PMIS (Space)(Prisoner’s Computer Number) لکھ کر 8070 پر میسج کریں، محکمہ داخلہ کے جوابی میسج میں قیدی کو ملنے والی گزشتہ دو معافیوں کی تفصیل اور رہائی کی تاریخ دی جائے گی، یہ تمام معلومات صرف ایک میسج پر دستیاب ہیں جس کے سٹینڈرڈ چارجز پانچ روپے ہیں۔
ترجمان محکمہ داخلہ پنجاب نے مزید بتایا کہ جیل قوانین کے مطابق قیدیوں کی سزا میں کمی یا معافی کی کئی صورتیں ہیں، سرکاری سطح پر معافی کے اعلان کے علاوہ تعلیم، تکنیکی صلاحیت کے حصول اور اچھے کردار پر سزا میں معافی دی جاتی ہے، سزا میں ہر معافی کو فوری طور پر قیدی کے ریکارڈ کا حصہ بنایا جانا ضروری ہے۔ سیکرٹری داخلہ پنجاب نور الامین مینگل نے جدید سسٹم کی افتتاحی تقریب سے خطاب میں کہا کہ اب قیدیوں یا اہل خانہ کو سزا میں معافی کا ریکارڈ حاصل کرنے میں کوئی دشواری نہیں ہوگی۔انہوں نے کہا کہ قیدیوں کی سزا میں معافی اور رہائی کا تمام ڈیٹا شفاف انداز میں آن لائن کر دیا گیا ہے تاکہ کسی قیدی کو مقررہ سزا سے ایک لمحہ بھی اضافی قید میں نہ رکھا جائے۔
انہوں نے کہاکہ قیدیوں کی سزا میں معافی کا ریکارڈ بروقت اپڈیٹ کرنے کیلئے قواعد و ضوابط جاری کیے ہیں، محکمہ داخلہ کے ڈائریکٹوریٹ آف مانیٹرنگ کو ہدایت کی ہے کہ جیلوں میں سرپرائز وزٹ کریں اور وزیراعلی پنجاب کے پریزن ریفارمز ایجنڈا پر من و عن عملدرآمد یقینی بنایا جائے، کسی بھی سطح پر قواعد کی خلاف ورزی کی صورت میں سخت ایکشن لیا جائے گا۔
تقریب میں سیکرٹری داخلہ پنجاب نور الامین مینگل کے ہمراہ سپیشل سیکرٹری فضل الرحمان، ایڈیشنل سیکرٹری پریزن عاصم رضا، چیئرمین پنجاب چیریٹی کمیشن کرنل شہزاد عامر، ایڈیشنل سیکرٹری جوڈیشل عمران رانجھا، ایڈیشنل سیکرٹری فارن نیشنل سکیورٹی عظمی سلیم و دیگر نے شرکت کی۔
Short Link: https://urdu.app.com.pk/urdu/?p=578397
