لاہور۔22اپریل (اے پی پی):محکمہ زراعت پنجاب نے ترشاوہ پھلوں کی دیکھ بھال بارے سفارشات جاری کر دیں۔ ترجمان محکمہ زراعت پنجاب کے مطابق باغبان پودوں کے کچے گلے اور غیر معمولی بڑھوتری والی شاخیں کاٹیں۔ ویلنشیا لیٹ کی برداشت اور پیوند کاری کا عمل مکمل کریں۔
باغات سے جڑی بوٹیوں کا تدارک یقینی بنائیں۔پھلدار پودوں میں اگر پھل بن چکا ہو تو نائٹروجن کھاد فوری طور پر ڈالیں اور عناصر صغیرہ کا سپرے بھی کریں۔موسمی حالات اور زمینی ساخت و کیفیت کو مدنظر رکھتے ہوئے15 دن کے وقفہ سے آبپاشی کریں۔بارشوں کے دوران سٹرس کینکر پھیلنے کا خدشہ ہوتا ہے۔ اس لئے تنوں پر بورڈ و پیسٹ کریں۔ جنسی پھندے لگانے کا عمل شروع کریں۔
اس کے علاوہ تھرپس اورسکیب/ میلا نوز کے خلاف محکمہ زراعت پنجاب کے مقامی زرعی ماہرین کے مشورہ سے مناسب زرعی زہروں کا سپرے کریں۔ ترجمان محکمہ زراعت پنجاب نے مزید کہا کہ باغبان پودوں کی چھتری کی کانٹ چھانٹ کریں۔الجھی ہوئی،خشک اور بیمار شاخیں پھل لگنے سے پہلے کاٹ دیں۔باغ کے ارد گردہوا توڑ باڑ لگائیں اورپیوند کاری کے عمل کی تکمیل کا جائزہ لیں۔
Short Link: https://urdu.app.com.pk/urdu/?p=585652
