فیصل آباد ۔ 06 اکتوبر (اے پی پی):محکمہ زراعت توسیع فیصل آباد کے ڈپٹی ڈائریکٹر چوہدری خالد محمودنے کاشتکاروں کو برسیم کی مخلوط کاشت سرسوں کی بجائے رائی گراس یا جئی کے ساتھ کرنے کا مشورہ دیا ہے اور کہا ہے کہ اس سلسلہ میں 15 سے 20 کلوگرام فی ایکڑ معیاری بیج استعمال کیاجائے تاکہ برسیم کی بہترین مخلوط پیداوار حاصل ہو سکے جبکہ برسیم اور لوسرن کو پہلا پانی بجائی کے ایک ہفتے اور جئی کو3 ہفتے بعد دینا چاہیے نیز کاشتکار برسیم اور لوسرن کا صاف ستھرا و معیاری 6 سے 8کلوگرام بیج فی ایکڑ استعمال کر سکتے ہیں۔
انہوں نے کہاکہ برسیم، لوسرن اور اگیتی جئی کی کاشت فوری طور پر شروع کر کے 31 اکتوبر تک جبکہ جئی کی درمیانی و پچھیتی کاشت دسمبر کے آخر تک بھی کاشت کی جاسکتی ہے۔ انہوں نے کہاکہ معیاری سبز چارے کے حصول سے جہاں کاشتکار بہتر منافع حاصل کر سکتے ہیں وہیں جانوروں کی صحت اور ان کے گوشت و دودھ کی پیداوار میں بھی زبردست اضافہ ممکن بنایاجا سکتاہے۔ انہوں نے کہاکہ زرعی عملہ کاشتکاروں کی رہنمائی کیلئے ہمہ وقت کوشاں ہے جبکہ اس ضمن میں مزید رہنمائی و مشاورت کیلئے محکمہ زراعت کے فیلڈ سٹاف سے بھی رابطہ کیاجاسکتاہے۔
Short Link: https://urdu.app.com.pk/urdu/?p=508934
