فیصل آباد۔ 10 جولائی (اے پی پی):محکمہ زراعت نے کاشتکاروں کو آگاہ کیا ہے کہ بارانی علاقوں میں مون سون کی بارشیں شروع ہونے کے باعث مونگ کی بوائی زیادہ سے زیادہ 15 جولائی تک مکمل کرنے کی ہدایت کی ہے۔ ترجمان محکمہ زراعت نے کاشتکاروں سے کہا کہ کاشت تر وتر حالت میں کریں، قطاروں کا باہمی فاصلہ ایک فٹ اور پودے کاپودے سے فاصلہ 8انچ یا 10 سینٹی میٹر رکھیں۔
انہوں نے کہا کہ کاشتکار بوقت کاشت ایک بوری ڈی اے پی اور آدھی بوری پوٹاشیم سلفیٹ فی ایکڑ ضرور ڈالنے کی بھی ہدایت کی گئی ہے تاکہ اچھی پیداوارحاصل کی جا سکے۔انہوں نے کہاکہ کاشتکار آبپاش علاقوں میں مونگ کی منظور شدہ اقسام نیاب مونگ 2006، ازری مونگ 2006، نیاب مونگ 2011وغیرہ جبکہ بارانی علاقوں میں چکوال ایم 6کاشت کریں۔ انہوں نے بتایاکہ شرح بیج 10 سے 12 کلوگرام فی ایکڑ ہونی چاہیے۔ انہوں نے بتایاکہ مونگ کی کاشت کیلئے میرازمین انتہائی موزوں ہوتی ہے جبکہ کلراٹھی اور سیم زدہ زمینوں میں مونگ کی کاشت سے گریز کرنا چاہیے۔
انہوں نے کاشتکاروں کو مونگ کی فصل کی پہلی دفعہ کاشت کیلئے جراثیمی ٹیکے شعبہ دالیں و بیکٹیریالوجی ایوب ریسرچ اور قومی زرعی تحقیقاتی سنٹر اسلام آباد سے حاصل کرنے کی ہدایت کی ہے اور کہاہے کہ جس کھیت میں مونگ کی فصل پہلی دفعہ کاشت کی جارہی ہو وہاں مونگ کے بیج کو جراثیمی ٹیکہ ضرور لگایاجائے جو مذکورہ اداروں سے حاصل کیا جاسکتاہے نیز جراثیمی ٹیکہ لگانے سے پودوں کی نائٹروجن حاصل کرنے کی صلاحیت بڑھ جاتی ہے جس سے اچھی پیداوار کاحصول ممکن ہو جاتاہے۔
Short Link: https://urdu.app.com.pk/urdu/?p=373265
