سیالکوٹ۔4اپریل (اے پی پی):محکمہ لائیو سٹاک و ڈیری ڈویلپمنٹ سیالکوٹ نے بجوات کے علاقوں میں موبائل ویٹرنری کیمپ کا انعقاد کیا ۔ اس کیمپ کی قیادت ایڈیشنل ڈائریکٹر محکمہ لائیو سٹاک سیالکوٹ ڈاکٹر محمد وسیم نے کی، جبکہ ڈپٹی ڈائریکٹر محکمہ لائیو سٹاک تحصیل سیالکوٹ ڈاکٹر تنویر احمد اور دیگر اسٹاف نے بھرپور خدمات انجام دیں، اس کیمپ کا مقصد مویشیوں کی صحت کو بہتر بنانا، بیمار جانوروں کا علاج، اور مالکان کو جانوروں کی دیکھ بھال کے جدید اور موثر طریقے سکھانا تھا۔ اس دوران جانوروں کی مکمل تشخیص کی گئی اور بیماریوں کے علاج کے لئےفوری اقدامات کیے گئے۔
مالکان کو آگاہی اور مفت سہولیات فراہم کی گئیں کیمپ میں مویشیوں کے مالکان کو جانوروں کی خوراک، دیکھ بھال، اور بیماریوں سے بچاؤ کے لیے خصوصی تربیت دی گئی۔ مالکان کو جدید طریقوں سے مویشیوں کی صحت اور افزائش کو بہتر بنانے کے عملی طریقے سکھائے گئے۔ جانوروں کے علاج کے ساتھ ساتھ ضروری دوائیاں اور ویکسی نیشن کی گئیں ۔ علاقے کے مالداروں نے محکمہ لائیو اسٹاک کے اس اقدام کو سراہا اور کہا کہ اس طرح کے ویٹرنری کیمپ نہ صرف مویشیوں کی صحت کے لئے اہم ہیں بلکہ علاقے کی معیشت اور لائیو اسٹاک کے شعبے کی ترقی میں بھی کلیدی کردار ادا کرتے ہیں۔
یہ کیمپ نہ صرف جانوروں کے لئے فوری طبی امداد فراہم کرنے کا ذریعہ بنا بلکہ مالکان کو مویشیوں کی دیکھ بھال کے بارے میں عملی معلومات فراہم کیں۔ اس سے علاقے میں مویشی پال حضرات کی زندگیوں میں نمایاں بہتری متوقع ہے۔محکمہ لائیو سٹاک کے مطابق، ایسے اقدامات کو جاری رکھا جائے گا تاکہ مویشیوں کی صحت بہتر ہو، بیماریوں کا بروقت علاج ممکن ہو اور علاقے کی معیشت کو مستحکم بنایا جا سکے۔
Short Link: https://urdu.app.com.pk/urdu/?p=578393
