لاہور۔13نومبر (اے پی پی):محکمہ موسمیات نے 14 نومبر تا 16 نومبر تک پنجاب کے بیشتر اضلاع میں ہلکی بارشوں کی پیشگوئی کر دی۔ترجمان پی ڈی ایم اے کے مطابق محکمہ موسمیات کی جانب سے 14 نومبر بروز جمعرات سے 16 نومبر تک پنجاب کے اضلاع راولپنڈی،مری،اٹک،چکوال، تلہ گنگ،جہلم، فیصل آباد،گوجرانوالہ،لاہور،میانوالی،خوشاب اور سرگودھا میں بارشوں کی پیشگوئی کی گئی ہے۔
ترجمان کے مطابق15 نومبر کو بھکر، لیہ اور ڈیرہ غازی خان میں بھی گرج چمک کے ساتھ بارش کا بھی امکان ہے۔دریں اثنا ڈی جی پی ڈی ایم اے عرفان علی کاٹھیا نے کہا کہ ممکنہ بارشوں سے سموگ میں کمی کے امکانات ہیں،سموگ سے بچائو کیلئے ماسک کا استعمال کریں اور غیر ضروری باہر نہ نکلیں،پی ڈی ایم اے کنٹرول روم میں صورتحال کی مسلسل مانیٹرنگ جاری ہے،
شہری خراب موسم کی صورتحال میں غیر ضروری سفر سے گریز کریں اور دوران سفر فوگ لائٹس کا استعمال کریں۔شہری ہنگامی صورتحال میں پی ڈی ایم اے کی ہیلپ لائن 1129 پر کال کر سکتے ہیں۔
