محکمہ موسمیات کی جیکب آباد ، شکارپور اور لاڑکانہ سمیت اکثر علاقوں میں بارشوں کی پیشگوئی

لاڑکانہ ۔18اگست (اے پی پی):محکمہ موسمیات نے سندھ بھر میں آئندہ 72 گھنٹوں کے دوران موسلادھار بارشوں کی پیش گوئی کرتے ہوئے خبردار کیا ہے کہ صوبے کے بعض اضلاع میں سیلاب کا خدشہ ہے۔محکمہ موسمیات کی جانب سے جاری ایڈوائزری میں کہا گیا ہے کہ طاقتور مون سون ہواؤں کا ایک سلسلہ بلوچستان کے شمال وسطی، مشرقی اور شمال مشرقی علاقوں کو متاثر کر رہا ہے۔محکمہ موسمیات نے جیکب آباد، شکارپور،لاڑکانہ، قمبر، شہداد کوٹ، گھوٹکی، سکھر، خیرپور، کشمور،نوشہرہ فیروز، شہید بینظیر آباد، میرپورخاص، عمرکوٹ،سانگھڑ، جامشورو اور دادو میں وقفے وقفے سے گرج چمک کے ساتھ بارش کی پیشگوئی کی ہے۔ایڈوائزری میں کہا گیا ہے کہ موسم کی یہ صورتحال 19 اگست تک برقرار رہے گی۔

محکمہ موسمیات کے مطابق جیکب آباد اور شکارپور ،گھوٹکی، سکھر، خیرپور، کشمورسمیت نشیبی علاقوں میں پانی جمع ہونے کا خدشہ ہے۔ جس سے سیلابی صورتحال پیدا ہو سکتی ہے۔محکمہ موسمیات نے خبردار کیا ہے کہ بارش، تیز ہواؤں، آسمانی بجلی کی وجہ سے کچے مکانات کی چھتیں اور دیواریں گرسکتی ہیں۔ بجلی کے کھمبوں، بل بورڈز، گاڑیوں اور سولر پینلز کو بھی نقصان پہنچ سکتا ہے۔کسانوں کو مشورہ دیا گیا ہے کہ وہ موسم کی پیشگوئی کو مدنظر رکھتے ہوئے اپنی سرگرمیاں جاری رکھیں۔ متعلقہ حکام کو بھی ہنگامی صورتحال سے نمٹنے کے لیے الرٹ رکھا گیا ہے۔

Short Link: https://urdu.app.com.pk/urdu/?p=495120