26 C
Islamabad
اتوار, اگست 31, 2025
ہومقومی خبریںمحکمہ موسمیات کی 29 اگست سے 2ستمبر کے دوران ملک کے بالائی...

محکمہ موسمیات کی 29 اگست سے 2ستمبر کے دوران ملک کے بالائی اور وسطی علاقوں میں وقفہ وقفہ سے تیز ہواؤں اور گرج چمک کے ساتھ مزید بارشوں کی پیشگوئی

- Advertisement -

اسلام آباد۔27اگست (اے پی پی):محکمہ موسمیات نے 29 اگست سے 2ستمبر کے دوران ملک کے بالائی اور وسطی علاقوں میں وقفہ وقفہ سے تیز ہواؤں اور گرج چمک کے ساتھ مزید بارشوں کی پیشگوئی کی ہے۔محکمہ موسمیات کے مطابق 29 اگست سے بحیرہ عرب اور خلیج بنگال سے مون سون ہوائیں شدت کے ساتھ ملک کے بالائی علاقوں میں داخل ہوں گی۔ 30 اگست سے مغربی ہواؤں کا سلسلہ بھی ملک کے بالائی اور وسطی علاقوں میں داخل ہونے کا امکان ہے جس کے زیر اثرکشمیر / گلگت بلتستان میں29 اگست سے 2 ستمبر کے دوران کشمیر (وادی نیلم، مظفرآباد، راولاکوٹ، پونچھ، ہٹیاں، باغ، حویلی، سدھنوتی، کوٹلی، بھمبر، میرپور) میں تیز ہواؤں اور گرج چمک کے ساتھ وقفہ وقفہ سے اکثر مقامات پر بارش جبکہ کہیں کہیں موسلادھار /شدید موسلادھار بارش کا امکان ہے۔

30 اگست سے یکم ستمبر کے دوران گلگت بلتستان (دیامیر، استور، غذر، سکردو، ہنزہ، گلگت، گانچھے، شگر) میں تیز ہواؤں اور گرج چمک کے ساتھ بارش اور چند مقامات پر موسلادھار بارش کی توقع ہے۔خیبر پختونخوا میں29 اگست سے یکم ستمبر کے دوران دیر، چترال، سوات، کوہستان، شانگلہ، بٹگرام، مانسہرہ، ایبٹ آباد، ہری پور، بونیر، مالاکنڈ، باجوڑ، مہمند، کوہاٹ، پشاور، چارسدہ، نوشہرہ، مردان، صوابی، خیبر، اورکزئی، کرم، ہنگو، کرک، بنوں، لکی مروت، وزیرستان، ٹانک اور ڈیرہ اسماعیل خان میں گرج چمک کے ساتھ وقفے وقفے سے بارش جبکہ چند مقامات پر موسلادھار / شدید موسلادھار بارش کی توقع ہے۔

- Advertisement -

پنجاب / اسلام آباد میں 29 اگست سے 2 ستمبر کے دوران اسلام آباد/راولپنڈی، مری، گلیات، اٹک، چکوال، جہلم، منڈی بہاؤالدین، گجرات، گوجرانوالہ، حافظ آباد، وزیر آباد، لاہور، قصور، شیخوپورہ، سیالکوٹ، نارووال، میانوالی، خوشاب، سرگودھا، جھنگ، ٹوبہ ٹیک سنگھ، ننکانہ صاحب، چنیوٹ، فیصل آباد اور ساہیوال میں گرج چمک کے ساتھ وقفہ وقفہ سے بارش جبکہ کہیں کہیں موسلادھار /شدید موسلادھار بارش کی توقع ہے۔ 29 اگست (رات) سے 2 ستمبر کے دوران ڈی جی خان، بھکر، لیہ، ملتان، بہاولپور، بہاولنگر، راجن پور اور رحیم یار خان میں بھی گرج چمک کے ساتھ بارش اور چند مقامات پر موسلادھار بارش کا امکان ہے۔

سندھ میں 30 اور 31 اگست کو مٹھی، تھرپارکر، سکھر، لاڑکانہ، جیکب آباد، دادو اور عمرکوٹ میں گرج چمک کے ساتھ بارش کا امکان ہے۔بلوچستان میں30 اگست سے یکم ستمبر کے دوران بارکھان، موسیٰ خیل، لورالائی، سبی، ژوب، قلات اور خضدار میں گرج چمک کے ساتھ بارش اور چند مقامات پر موسلادھار بارش کا امکان ہے۔ممکنہ اثرات اور احتیاطی تدابیر کے تحت 29 اگست (رات) سے یکم ستمبر کے دوران شدید بارشوں کے باعث کشمیر، مری، گلیات، اسلام آباد/راولپنڈی، شمال مشرقی پنجاب، چترال، دیر، سوات، شانگلہ، بونیر، کوہستان، مانسہرہ، ایبٹ آباد، چارسدہ، نوشہرہ، صوابی اور مردان کے ندی نالوں میں طغیانی کا خطرہ ہے۔

29 اگست (رات) سے یکم ستمبر کے دوران اسلام آباد/راولپنڈی، گوجرانوالہ، لاہور، سیالکوٹ، فیصل آباد، پشاور، نوشہرہ اور مردان کے نشیبی علاقوں کے زیر آب آنے کا خدشہ ہے۔شدید بارشوں کے باعث خیبرپختونخوا، گلگت بلتستان، مری، گلیات اور کشمیر کے پہاڑی علاقوں میں لینڈ سلائیڈنگ اور ٹریفک میں رکاوٹ کا خطرہ ہے ،آندھی، گرج چمک اور بارش کے باعث کمزور انفراسٹرکچر (کچے گھر، دیواریں، بجلی کے کھمبے، بل بورڈز، گاڑیاں، سولر پینل) کو نقصان کا اندیشہ ہے۔

مسافروں اور سیاح حضرات کو محتاط رہنے، سفر سے پہلے موسمی صورتحال معلوم کرنے اور احتیاطی تدابیر اختیار کرنے کی ہدایت کی گئی ہے۔ تمام متعلقہ اداروں کو "الرٹ” رہنے اور کسی بھی ناخوشگوار واقعہ سے بچنے کے لئے فوری اقدامات کی ہدایت کی جاتی ہے۔

 

- Advertisement -
متعلقہ خبریں
- Advertisment -

مقبول خبریں