سیالکوٹ۔21فروری (اے پی پی):پاکستان میں تعینات مراکش کے سفیرمحمد قارمون نے سیالکوٹ چیمبر آف کامرس اینڈ انڈسٹری (ایس سی سی آئی)کا دورہ کیا۔ صدر سیالکوٹ چیمبر اکرام الحق نے معزز مہمانوں کا پرتپاک استقبال کیا اور انہیں چیمبر آمد پر خوش آمدید کہا۔ اکرام الحق نے خطبہ استقبالیہ پیش کرتے ہوئے کہا کہ پاکستان اور مراکش کے درمیان بہترین قریبی تعلقات ہیں جن سے دونوں ممالک کے عوام مستفید ہو رہے ہیں ۔ انہوں نے مراکش اورپاکستان کے درمیان باہمی تجارتی تعلقات کو فروغ دینے کے لیے ہرممکن مخلصانہ کوششیں کرنے کے عزم کا اظہار کرتے ہوئے کہا کہ دونوں ممالک کے درمیان ان باہمی تجارتی تعلقات کو مزید مستحکم کرنے کا وقت آ گیا ہے۔
انہوں نے کہا کہ دونوں ممالک کے درمیان باہمی احترام، افہام و تفہیم ، امن اور سماجی و اقتصادی ترقی کے لیے مشترکہ وژن ہے۔ انہوں نے مزید کہا کہ اب وقت آگیا ہے کہ ہم اپنی کوششوں سے دونوں ملکوں کے درمیان اقتصادی ، سیاسی اور سفارتی تعلقات کو مزید بڑھانے پر توجہ مرکوز کریں ۔ انہوں نے کہا کہ تجارتی وفود کے تبادلے سے دونوں ممالک کے درمیان دوطرفہ تجارتی اور کاروباری تعلقات کو مزید فروغ دینا چاہیے۔اس موقع پر مراکش کے سفیر محمد قارمون نے بھی خطاب کیا اور کہا کہ پاکستان بالخصوص سیالکوٹ کے چاول باسمتی دنیا بھر میں اپنی ایک پہچان رکھتے ہیں جس کے ذائقے کا کوئی جواب نہیں۔
انہوں نے سیالکوٹ چیمبر آف کامرس اینڈ انڈسٹری کی دستاویزی فلم "سیالکوٹ دی سٹی آف پروگریسو پیپل” میں بھی گہری دلچسپی ظاہر کی جو اس اجلاس کے دوران دکھائی گئی۔انہوں نے مزید کہا کہ دونوں ممالک خوشگوار تعلقات سے لطف اندوز ہو رہے ہیں جو انتہائی خوش آئند بات ہے۔ اجلاس کے احتتام پر صدر سیالکوٹ چیمبر آف کامرس اینڈ انڈسٹری اکرام الحق کی جانب سے معزز مہمانوں کو سیالکوٹ چیمبر کی یادگاری شیلڈ بھی پیش کی گئی۔ سینئر نائب صدر سیالکوٹ چیمبر آف کامرس اینڈ انڈسٹری وسیم شہباز لودھی، نائب صدر عمر خالد سمیت سابق صدور چیمبر اور بزنس کمیونٹی کی کثیر تعداد بھی اس موقع پر یہاں موجود تھی۔
Short Link: https://urdu.app.com.pk/urdu/?p=564537
