پشاور۔ 17 مارچ (اے پی پی):مردان میں نجی فلاحی تنظیم صمیم آرفن کئیر پاکستان کی جانب سے مستحقین مردان میں ”رمضان فوڈ پیکیج“کے تحت ایک ہزار مستحق خاندانوں میں راشن تقسیم کئے گئے۔رمضان فوڈ پیکج میں آٹا،گھی،چینی،چاول،کھجور،دالیں،چنا، لوبیا،بیسن و دیگر اشیا شامل تھیں،اس حوالے سے مردان کے مقامی شادی ہال میں تقریب کا انعقاد کیا گیا جس کے مہمان خصوصی ایڈیشنل ڈپٹی کمشنر ریلیف اینڈ ہیومن رائٹس مردان اقبال حسین خٹک تھے۔
تقریب میں صمیم آرفن کئیر کی ڈاکٹر عظمیٰ، وائس چیئرمین سلمان شاہ بخاری،عاطف اکرم،ڈاکٹر کنزہ ،انجینئر سیف اکرم و دیگر نے معذورافراد،بیوائوں،یتیموں اور مستحق افراد میں رمضان پیکجز تقسیم کئے۔ ایڈیشنل ڈپٹی کمشنر ریلیف اینڈ ہیومن رائٹس نے صمیم آرفن کئیر پاکستان کی کاوشوں کو سراہا اور اپنی طرف سے مکمل تعاون کی یقین دہانی کرائی۔
اس موقع پر صمیم آرفن کئیر کی ڈاکٹر عظمیٰ نے کہا کہ مستحق خاندانوں کو راشن کی فراہمی کا مقصدغریب اور کمزور طبقے کو رمضان المبارک کی بابرکت گھڑیوں میں شریک کرنا ہے ۔ سلمان شاہ بخاری نے کہا کہ ہماری کوشش ہوتی ہے کہ کمزور طبقے کو موقع فراہم کیا جائے کہ وہ بھی رمضان المبارک کی بابرکت ساعتوں سے استفادہ کرے۔
Short Link: https://urdu.app.com.pk/urdu/?p=573363
