بیجنگ ۔25فروری (اے پی پی):بین الاقوامی محققین نے دعوی کیا ہے کہ مریخ پرکبھی ساحل، لہروں اور ہوا کے ساتھ سمندر موجود تھا۔ سائنسی جریدے ’’پروسیڈنگز آف نیشنل اکیڈمی آف سائنسز‘‘(پی این اے ایس )میں شائع ہونے والے ایک مقالے کے مطابق بین الاقوامی محققین کی ایک ٹیم نے چینی مریخ روور ’زھورونگ‘کی طرف سے جمع کردہ ڈیٹا کا تجزیہ کیا ہے اور اس بات کے شواہد ملے ہیں کہ سرخ سیارے پر تقریباً 3 بلین سال قبل ساحل، لہروں اور ہوا کے ساتھ سمندر موجود تھا ۔
امریکی اور چینی یونیورسٹیوں کے محققین نےزھورونگ کی طرف سے جمع کردہ ڈیٹا کا مطالعہ کیا، جو 2021 میں مریخ کے ایک ایسے علاقے میں اترا تھا جسے ’یوٹوپیا پلینیشیا ‘کہا جاتا ہے۔مارس روور کو سیارے پر قدیم پانی یا برف کے آثار تلاش کرنے کے لئے بھیجا گیا تھا، اور اس نے کم اور زیادہ تعدد والے ریڈار کا استعمال کرتے ہوئے اپنے اردگرد کے ارضیات سے متعلق ڈیٹا اکٹھا کیا تھا۔ امریکی یونیورسٹی پین اسٹیٹ میں ارضیات کے اسسٹنٹ پروفیسر بینجمن کارڈیناس کے مطابق ہم مریخ پر ایسی جگہیں تلاش کر رہے ہیں جو قدیم ساحلوں اور قدیم دریا کے ڈیلٹا کی طرح نظر آتے تھے اور دوران تحقیق ہمیں وہاں ہوا، لہروں، ریت کی کمی نہ ہونے کے ثبوت ملے یعنی ایک مناسب، تعطیلاتی طرز کا ساحل کبھی مریخ پر موجود تھے۔
محققین امریکی نیشنل اکیڈمی آف سائنسز کے جریدے میں لکھتے ہیں کہ مختلف مشاہدات سے پتہ چلتا ہے کہ مریخ کی سطح پر ایک بار بڑی مقدار میں پانی موجود تھا، تاہم، اس پانی کی نوعیت اور قسمت غیر یقینی ہے۔یہ تلاش ماضی کے ایک بڑے آبی وجود کو ظاہر کرتی ہے، جو مریخ کے شمالی میدانوں میں سمندر کے مفروضے کی تائید کرتی ہے۔انہوں نے مزید کہا کہ یہ دریافت اس مفروضے کی تائید کرتی ہے کہ ایک بڑے سمندر نے مریخ کے شمالی قطب کے ایک بڑے حصے کو ڈھانپ لیا تھا۔
اعداد و شمار سے زمین کے ساحلوں پر اسی طرح کی تہدار ساخت کے ساتھ زیر زمین تلچھٹ کے ذخائر کا انکشاف ہوا ہے،یہ ہمارے لیے فوری طور پر سامنے آیا کیونکہ اس سے پتہ چلتا ہے کہ وہاں لہریں تھیں، جس کا مطلب ہے کہ ہوا اور پانی کا ایک متحرک تعامل تھا ۔آگ کے ایک افسانوی دیوتا کے نام سے موسوم، ’زھورونگ ‘روور کو 2020 میں چائنا نیشنل سپیس ایڈمنسٹریشن نے لانچ کیا اور 2021 سے 2022 تک چلایا۔ یہ ’یوٹوپیا پلینیشیا ‘میں اترا، جو 3,300 کلومیٹر قطر میں پھیلا ہوا ایک وسیع خطہ ہے۔ سائنس دانوں کا خیال ہے کہ اس خطے میں کبھی پانی کا ایک بڑا ذخیرہ موجود تھا۔
Short Link: https://urdu.app.com.pk/urdu/?p=565926
