لاہور۔16دسمبر (اے پی پی):وزیر اعلی پنجاب مریم نوازکے 8روزہ کامیاب دورہ چین کو خراج تحسین پیش کرنے کیلئے استحکام پاکستان پارٹی کے صوبائی جنرل سیکرٹری و ممبر صوبائی اسمبلی شعیب صدیقی نے پنجاب اسمبلی کے رواں اجلاس میں قرارداد جمع کرا دی ہے۔
قرارداد میں کہا گیا ہے کہ وزیر اعلی پنجاب کا دورہ چین دونوں ممالک کی دیرینہ دوستی کو مزید پائیدار، مضبوط اور نئی جہتوں سے متعارف کرانے کا باعث ہے اور کئی اہم معاہدے اور ایم او یوز پر دستخط ہونا صوبے کی ترقی، خوشحالی اور استحکام کی جانب اہم قدم ہے۔ قرار داد کے متن میں مزید کہا گیا ہے کہ پاور سیکٹر، انفارمیشن ٹیکنالوجی، تعلیم، ہیلتھ اور سموگ کے تدارک سمیت متعدد منصوبوں پر پیش رفت لائق تحسین ہے جبکہ چین سے عوامی مفاد کیلئے کامیاب مذاکرات صوبے بھر میں ترقی کی نئی راہیں کھولنے کا باعث ہوں گے۔
قرارداد میں وزیر اعلی پنجاب کی سربراہی میں دورے کے ثمرات جلد از جلد عوام تک پہنچنے کے دعائیہ کلمات کے ساتھ اظہار تشکر بھی کیا گیا۔ ا س موقع پر گفتگو کرتے ہوئے صوبائی جنرل سیکرٹری و رکن پنجاب اسمبلی شعیب صدیقی کا کہناتھاکہ وزیر اعلی پنجاب صوبے کو ترقی کی نئی منازل سے متعارف کرانے کے سفر کی جانب گامزن ہیں اور ان کا حالیہ دور چین بھی اسی سلسلے کی ایک کڑی ہے۔
انہوں نے کہا کہ وزیر اعلی پنجاب کی صوبے کے تمام مسائل پر گہری نظر اس دورے کی کامیابی کی کلید ثابت ہوئی ہے۔ شعیب صدیقی نے مزید کہا کہ اس دورے کے دوران وزیر اعلی کی جانب سے چائنہ کی کمپنیوں سے عوامی فلاح و بہبود کیلئے کئے جانے والے معاہدوں سے ترقی کا نیا سورج طلوع ہو گا۔ استحکام پاکستان پارٹی اور پنجاب حکومت عوامی مفاد، معاشی ترقی اور استحکام کیلئے شانہ بشانہ کھڑے ہیں۔
