مری روڈ پر واقع مدرسہ انتظامیہ کی مکمل مشاورت اور رضامندی سے منتقل کیا گیا ہے،وزیرمملکت طلال چوہدری

اسلام آباد۔10اگست (اے پی پی):وزیرِ مملکت برائے داخلہ طلال چوہدری نے کہا ہے کہ مری روڈ پر واقع مدرسہ کو مدرسہ انتظامیہ کی مکمل مشاورت اور رضامندی سے منتقل کیا گیا ہے، نئے مقام پر 4 کروڑ روپے کی لاگت سے جدید طرز کا مدرسہ تعمیر کیا گیا ہے،

جہاں تقریباً 200 طلبہ کے لیے رہائش، کھانے پینے اور دینی تعلیم کی بہترین سہولیات موجود ہیں۔اتوار کو وزارت داخلہ سے جاری بیان کے مطابق انہوں نے واضح کیا کہ گرین بیلٹ یا غیر مجاز جگہوں پر موجود مدارس یا مساجد کو منتقل کرنے کاعمل علما کرام اور انتظامیہ کی مشاورت سے ہی کیا جائے گا۔انہوں نے مدارس و مساجد کے بارے میں بے بنیاد افواہیں پھیلانے سے گریز کرنے کی اپیل بھی کی ہے۔