مری۔ 26 اکتوبر (اے پی پی):مری سنو فال کے حوالے سے ڈسٹرکٹ پولیس آفس مری میں آر پی او راولپنڈی بابر سرفراز الپا کی زیر صدارت اجلاس منعقد ہوا ۔ اجلاس میں کمشنر راولپنڈی انجینئر عامر خٹک،ڈسٹرکٹ پولیس آفیسر مری آصف امین اعوان ،ڈپٹی کمشنر مری آغا ظہیر عباس شیرازی،سٹی ٹریفک آفیسر مغیث احمد ہاشمی، ایڈیشنل ڈپٹی کمشنر ریونیو کیپٹن شہریار شیرازی ،
اسسٹنٹ کمشنر مری محمد فیصل نے شرکت کی ۔ اجلاس میں سنو فال کے حوالے سے پیشگی اقدامات کا جائزہ لیا گیا اور سنو فال کی صورت میں پیش آنے والے ممکنہ حالات و اقعات کے تدارک کے لیے پیشگی اقدامات کو یقینی بنانے کے لیے اہم ہدایات دی گئیں تاکہ کسی بھی ناخوشگوار واقعے کے رونما ہونے سے بچا جا سکے۔ ڈی پی او آفس مری اور پولیس لائن کی نئی عمارتوں کی تعمیر کے حوالے سے امور زیر غور آئے اور ضلع مری میں ہونے والے جرائم کے انسداد کے لیے خصوصی ہدایات دی گئیں ۔
Short Link: https://urdu.app.com.pk/urdu/?p=517223
