اسلام آباد۔23جون (اے پی پی):وزیراعظم شہباز شریف نے ہدایت کی ہےکہ مری شہر کے لیے پانی کی فراہمی کے لیے جلد از جلد منصوبہ بندی کی جائے،مری کی لنک روڈز کی تعمیر نو کے لیے اقدامات کیئے جائیں،مری میں ہسپتال کی تعمیر کے رکے ہوئے کام کو شروع کرنے اور روات گاؤں کے ہائی اسکول کو ہائر سیکنڈری کا درجہ دینے کے لیے حکمت عملی تیار کی جائے،مری میں کرکٹ اسٹیڈیم کی تعمیر کا کام تیز کیا جائے۔
وزیر اعظم آفس پریس ونگ سے جاری پریس ریلیز کے مطابق وزیراعظم شہباز شریف نے جمعرات کو مری کا دورہ کیا۔اس موقع پر انہوں نےہسپتال، اسکول، سیاحت،فلاح عامہ کے حوالے سے ترقیاتی کام تیز کرنے کی ہدایت کی،اسلام آباد-مری ایکسپریس وے کی بہترین تعمیر نو اور ایکسپریس وے پر لینڈ سلائڈنگ کے مسائل جلد اور موثر طور پر حل کرنے کی ہدایت کی۔وزیراعظم شہباز شریف نے مری کے لیے ترقیاتی کاموں کا جائزہ لیتے ہوئے اس حوالے سے ہدایات جاری کیں۔
وزیراعظم نے ہدایت دی کہ مری شہر کے لیے پانی کی فراہمی کے لیے جلد از جلد منصوبہ بندی کی جائے۔علاوہ ازیں وزیراعظم نے کہا کہ مری کی لنک روڈز کی تعمیر نو کے لیے اقدامات کیئے جایئں ۔ وزیراعظم نے مری میں ہسپتال کی تعمیر کے رکے ہوئے کام کو شروع کرنے اور روات گاؤں کے ہائی اسکول کو ہائر سیکنڈری کا درجہ دینے کے لیے حکمت عملی تیار کرنے کی ہدایات بھی دیں ۔ مری میں کرکٹ اسٹیڈیم کی تعمیر کا کام تیز کرنے کی ہدایت بھی دی گئی۔
وزیراعظم نے مری شہر میں غیر قانونی تعمیرات کا سختی سے نوٹس لیتے ہوئے اس سلسلے میں سروے کروانے کے احکامات بھی دیئے۔ وزیراعظم نے نیو مری کے لیے ایسا ڈویلپمنٹ پلان تیار کرنے کے احکامات بھی دیئے جن سے علاقے کی خوبصورتی نہ صرف برقرار رہے بلکہ اس میں اور اضافہ ہو۔ کوٹلی ستیاں سے پتریاتا نیو مری اور بستال موڑ سے پنڈی پوانٹ تک سیاحوں کی سہولت کے لیے کیبل کارز چلانے کے حوالے سے حکمت عملی تیار کرنے کی ہدایت جاری کی گئی۔
وزیراعظم کو اسلام آباد مری ایکسپریس وے کو زمینی کٹاؤ اور لینڈ سلائڈنگ سے ہونے والے نقصانات سے بچاؤ کی حکمت عملی پر بریفنگ دی گئی ۔وزیراعظم کو بتایا گیا کہ پہاڑوں پر تعمیرات اور بارشیں زمینی کٹاؤ کا سبب بنتی ہیں جن سے بچاؤ کے لیے اقدمات کئے جا رہے ہیں اور ایکسپریس وے کے اطراف درخت لگائے جا رہے ہیں۔
اس حوالے سے اسلام آباد مری ایکسپریس وے پر موضع مانگا اورسمبلی بہرمل میں کام مکمل ہو چکا ہے جب کہ سمبلی بہرمل کے اطراف مزید کام تکمیل کے مراحل میں ہے۔ موضع کھجوٹ ،موضع مسیاری اور موضع بڑا ہوتر میں کام جلد شروع ہو جاےگا۔ وزیراعظم نے اسلام آباد مری ایکسپریس وے پر ناقص تعمیراتی کام کا سخت نوٹس لیتے ہوئے ہدایت کی کہ اس ایکسپریس وے کی تعمیر نو اور ایکسپریس وے کو زمینی کٹاؤ اور لینڈ سلائڈنگ سے بچاؤ کا کام ہزارہ موٹروے کی طرز پر کیا جائے۔
مزید برآں وزیراعظم نے ہدایت کی کہ اسلام آباد مری ایکسپریس وے پر جدید طرز کی تمام سہولیات سے ریسٹ ایریاز تعمیر کیے جائیں۔ وزیراعظم نے پنجاب حکومت کو اس سلسلے میں نیشنل ہائی وے اتھارٹی سے مکمل تعاون کی ہدایت کی۔
وزیراعظم نے نیشنل ہائی وے اتھارٹی کو اسلام آباد مری ایکسپریس وے کے لیے جیو ٹیک کنسلٹنٹ رکھنے کی ہدایت دی جس کوشفاف طریقہ کار کے ذریعےچنا جائے۔وفاقی وزیر مواصلات اسعد محمود،وفاقی وزیر اطلاعات و نشریات مریم اورنگزیب اور ممبر قومی اسمبلی شاہد خاقان عباسی بھی دورہ مری میں وزیراعظم کے ہمراہ تھے۔