اسلام آباد۔18فروری (اے پی پی):وزیراعظم کے معاون خصوصی برائے انسانی حقوق اور خواتین کی بااختیاری مشعال حسین ملک نے اپنے شوہر اور چیئرمین جموں کشمیر لبریشن فرنٹ (جے کے ایل ایف) محمد یاسین ملک کے ساتھ بھارتی حکام کے غیر انسانی سلوک کی شدید مذمت کی ہے۔ انہوں نے کہا کہ عدالتی احکامات کے باوجود یاسین ملک کو مناسب طبی امداد کے لیے ہسپتال لے جانے میں تاخیری حربے اختیار کرنے پر حکام کے غیر انسانی رویے کے خلاف انہوں نے ادویات لینا بند کر دیا تھا جس کے بعد ان کی صحت خطرناک حد تک بگڑ گئی ہے۔ مشعال حسین ملک نے کہا کہ ان میں لگایا گیا پیس میکر اب پرانا اور غیر موثر ہو چکا ہے جس سے ان کی زندگی خطرے میں پڑ گئی ہے۔ انہوں نے کہا کہ یاسین ملک دل کے مسائل کے علاوہ گردے کے عارضے میں بھی مبتلا تھے۔
انہوں نے مزید کہا کہ مصدقہ اطلاعات کے مطابق ان کے جسمانی وزن میں بھی کافی حد تک کمی آئی ہے جو تشویش کا باعث ہے۔ مشعال ملک نے کہا کہ اطلاعات کے مطابق محمد یاسین ملک کی صحت تہاڑ جیل میں مناسب علاج نہ ہونے کی وجہ سے تیزی سے بگڑ رہی ہے۔ انہوں نے کہا کہ صرف دو ہفتے قبل ان کی والدہ نے دہلی کی ایک عدالت سے رجوع کیا تھا تاکہ ان کے بیٹے کی بگڑتی ہوئی صحت کی طرف عدالت کی توجہ مبذول کرائی جاسکے اور اس کی صحت کے بارے میں حکام کی عدم دلچسپی کے خدشات پر تشویش کا اظہار کیا جاسکے۔ عدالت میں دائر درخواست میں ان کی والدہ نے اپنے بیٹے کے علاج کے اخراجات برداشت کرنے پر بھی آمادگی ظاہر کی ہے۔
مشعال ملک نے کہا کہ ان کے شوہر یاسین ملک کی طبیعت بگڑ رہی ہے اور عدالتی احکامات میں کہا گیا ہے کہ یاسین ملک کو فوری طور پر اسپتال منتقل کیا جائے اور مکمل صحت یابی تک ڈاکٹروں کی نگرانی میں رکھا جائے۔انہوں نے کہا کہ یاسین ملک کی حالت خطرناک حد تک بگڑنے کے بعد13 فروری کو دہلی کے ایک سرکاری اسپتال لے جایا گیا تھا۔ انہوں نے کہا کہ عدالت کی جانب سے انہیں ہسپتال میں نگرانی میں رکھنے کے احکامات کے باوجود حکام انہیں معمول کے طبی معائنے کے بعد واپس جیل لے گئے۔
انہوں نے انسانی حقوق کے بین الاقوامی اداروں سے اپیل کی کہ وہ مداخلت کریں تاکہ جموں و کشمیر کے عوام کے سب سے مقبول آزادی پسند سیاسی رہنما کی قیمتی جان بچائی جا سکے۔ انہوں نے اس بات پر بھی زور دیا کہ جموں و کشمیر کے عوام اور قیادت کو جھوٹے اور من گھڑت مقدمات کے ذریعے یا بھاری اور غیر انسانی ہتھکنڈوں کے ذریعے ڈرایا دھمکایا یا دبایا نہیں جاسکتا ہے۔
