کراچی۔31اگست (اے پی پی):وزیراعظم کے مشیر برائے ہوا بازی ایئر مارشل(ر)فرحت حسین خان اور سیکرٹری ایوی ایشن کیپٹن(ر) سیف انجم نے سول ایوی ایشن ہیڈ کوارٹرز کراچی کا دورہ کیا، تنظیمی ڈھانچے، اس کے مینڈیٹ، بین الاقوامی مصروفیات اور سول ایوی ایشن اتھارٹی کے ذریعے شروع کئے گئے مختلف مکمل اور جاری منصوبوں کے بارے میں تفصیلات سے آگاہ کیا۔
سول ایوی ایشن اتھارٹی کے ترجمان کی طرف سے جمعرات کو جاری بیان کے مطابق وزیراعظم کے مشیر برائے ہوا بازی ایئر مارشل(ر)فرحت حسین خان اور سیکرٹری ایوی ایشن کیپٹن(ر) سیف انجم نے سول ایوی ایشن ہیڈ کوارٹرز کراچی کا دورہ کیا جہاں آمد پر ڈائریکٹر جنرل سول ایوی ایشن اتھارٹی خاقان مرتضی نے دیگر اعلی حکام کے ہمراہ ان کا استقبال کیا۔
اس موقع پر بریفنگ کا اہتمام کیا گیا اورسیکرٹری ایوی ایشن اور ڈی جی سول ایوی ایشن اتھارٹی نے ڈائریکٹرز کی مدد سے وزیراعظم کے مشیر برائے ہوابازی کو تنظیمی ڈھانچے، اس کے مینڈیٹ، بین الاقوامی مصروفیات اور سی اے اے کے ذریعے شروع کیے گئے مختلف مکمل اور جاری منصوبوں کے بارے میں تفصیلات سے آگاہ کیا۔
سول ایوی ایشن اتھارٹی کے ڈائریکٹرز نے ان منصوبوں کے بارے میں تفصیلی معلومات فراہم کیں اور ان منصوبوں کی اہمیت اور ہوا بازی کے شعبے پر اثرات کو اجاگر کیا۔ بات چیت کے دوران ہوا بازی سے متعلق مختلف امور بھی زیر بحث آئے جن میں ہوا بازی کی صنعت کی حفاظت اور سلامتی، ہوائی اڈے کے بنیادی ڈھانچہ، ایئر لائن کی مسابقتی فضااور صارفین کا تحفظ، ماحولیاتی خدشات، بین الاقوامی تعاون اور تکنیکی ترقی شامل تھے۔
اجلاس میں اس بات پر بھی تبادلہ خیال کیا گیا کہ ملک میں ہوابازی کے شعبے کو مزید ترقی دینے اور بہتر بنانے کے لیے مختلف اسٹیک ہولڈرز کے درمیان ہم آہنگی اور تعاون کو کس طرح بہتر بنایا جائے۔ وزیر اعظم کے مشیر برائے ہوا بازی نے سی اے اے اور اس کے حکام کی کوششوں کی تعریف کی۔ مجموعی طور پر اس دورے نے وزیر اعظم کے مشیر برائے ہوا بازی کو سی اے اے کے آپریشنز کے بارے میں بہتر انداز میں معلومات حاصل کرنے اور پاکستان میں ہوا بازی کی صنعت کو مضبوط اور آگے بڑھانے کے طریقوں پر تبادلہ خیال کرنے کا موقع فراہم کیا۔
فرحت حسین خان اور سیکرٹری ایوی ایشن کیپٹن(ر) سیف انجم کا سول ایوی ایشن ہیڈ کوارٹرز کا دورہ){kind=link}