اسلام آباد۔22مارچ (اے پی پی):اسلام آباد چیمبر آف کامرس اینڈ انڈسٹری (آئی سی سی آئی) کے صدر ناصر منصور قریشی نے ملک کے موجودہ معاشی مسائل کے خاتمہ کےلئے سیاسی اور مذہبی ہم آہنگی کی ضرورت پر زور دیا ہے۔ہفتہ کو جاری اپنے ایک بیان میں ناصرمنصور قریشی نے کہا کہ معاشی استحکام اور خوشحالی تمام شعبوں کی اجتماعی کوششوں پر منحصر ہے۔
انہوں نے متنوع سیاسی اور مذہبی پس منظر رکھنے والے رہنماؤں پر زور دیا کہ وہ اختلافات کو ایک طرف رکھ کر قومی ترقی کے لیے مل کر کام کریں۔ انہوں نے کہا کہ ہمیں اقتصادی چیلنجوں کا سامنا ہے جو ایک متحد نقطہ نظر کا تقاضا کرتے ہیں۔ ناصر منصور قریشی نے کہا کہ تمام اسٹیک ہولڈرز کو سیاسی اور معاشی استحکام کے حصول کیلئےمل بیٹھنا ہوگا جو کہ پائیدار ترقی اور خوشحالی کو یقینی بنانے کے لیے ضروری ہے۔
آئی سی سی آئی کے صدر نے اس بات پر زور دیا کہ معاشی ترقی کے لیے سیاسی استحکام اور پالیسی میں تسلسل ضروری ہے۔ انہوں نے کہا کہ طویل مدتی اور باہمی مشاورت سے ترتیب دی گئی پالیسیاں سرمایہ کاری، اختراعات اور پائیدار ترقی کے لیے سازگار ماحول پیدا کرتی ہیں۔انہوں نے مزید کہا کہ اتحاد کو فروغ دینے سے سرمایہ کاروں کا اعتماد بحال ہوگا، کاروباری ماحول بہتر ہوگا اور معاشی ترقی کے مواقع کھلیں گے۔
انہوں نے اقتصادی بحالی میں مدد کے لیے بات چیت اور تعاون کو فروغ دینے کے لیے اسلام آباد چیمبر کے عزم کا اعادہ کیا اور پالیسی سازوں، کاروباری رہنماؤں اور کمیونٹی کے نمائندوں پر زور دیا کہ وہ ایک مستحکم اور ترقی پذیر پاکستان کی تعمیر میں تعاون کریں۔
Short Link: https://urdu.app.com.pk/urdu/?p=575383
