اسلام آباد۔1فروری (اے پی پی):وفاق ایوانہائے صنعت و تجارت پاکستان (ایف پی سی سی آئی )کے صدر عاطف اکرام شیخ نے ریکارڈ محصولات جمع ہونے کے حوالہ سے کہا ہے کہ معاشی چیلنجز کے باوجود جنوری میں ریکارڈ 872 ارب روپے کے ٹیکس محصولات خوش آئند ہیں۔
عاطف اکرام شیخ نے ہفتہ کو اپنے ایک بیان میں کہا کہ یہ اعدادوشمار ظاہر کرتے ہیں کہ بزنس کمیونٹی ٹیکس دینا چاہتی ہے، ایف بی آر کی کارکردگی کو بہتر بنا کر محصولات کا ہدف بھی حاصل کیا جا سکتا ہے۔ انہوں نے کہا کہ شرح سود میں کمی سے معاشی سرگرمیوں کا فروغ، محصولات میں مزید اضافہ ہو گا،غیر منصفانہ، کاروبار مخالف ٹیکس نظام محصولات کے ہدف کے حصول میں رکاوٹ ہے۔
صدر ایف پی سی سی ائی نے مزید کہا کہ ملک منصفانہ ٹیکس نظام سے وفاقی سطح پر 34 ٹریلین محصولات حاصل کر سکتا ہے، وفاقی، صوبائی اور مقامی سطح پر سادہ، کم شرح اور وسیع البنیاد ٹیکسز کا نفاذ ضروری ہے۔
عاطف اکرام شیخ نے کہا کہ ایف بی آر میں اصلاحات کے بغیر اڑان پاکستان سے خود کفالت کی منزل کا حصول ممکن نہیں، انکم ٹیکس فارم آسان بنانے، کسٹمز میں فیس لیس سسٹم کے ذریعے شفافیت جیسے اقدامات کئے جائیں، ایف بی آر محصولات کے مقدمات جلد نمٹانے کیلئے بھی اقدمات کرے۔
