ریاض۔21نومبر (اے پی پی):وزیراعظم کے معاون خصوصی جواد سہراب ملک نے ریاض میں سعودی عرب کی وزارت انسانی وسائل اور سماجی ترقی کے وزیر ڈاکٹر عبداللہ ناصر ابوثنین اور نائب وزیر عدنان عبداللہ النعیم سے ملاقات کی۔ملاقات میں رہنماؤں نے پاکستان سے انسانی وسائل کی برآمدات کو بڑھانے کے لیے فوری ترسیل پر تبادلہ خیال کیا اور سعودی عرب اور پاکستان کے درمیان دیرینہ اور برادرانہ تعلقات کو اجاگر کیا۔ معاون خصوصی نے تقریباً 30 لاکھ پاکستانی کارکنوں کو ملازمت کے مواقع فراہم کرنے پر مملکت کی قیادت کی تعریف کی۔ملاقات میں رہنماؤں نے پاکستان سے سعودی عرب کو ہنرمند افرادی قوت کی برآمدات بڑھانے کے طریقوں پر بھی تبادلہ خیال کیا۔
معاون خصوصی نے بتایا کہ حکومت پاکستان نے پاکستانی کارکنوں کی ہنر مندی کو ترجیح دی ہے۔ انہوں نے کہا کہ حکومت سعودی عرب میں مزید ہنر مند افرادی قوت بھیجنا چاہتی ہے اور انسانی سرمائے کی ترقی کے لیے سعودی تکامول کو پاکستان میں مزید ٹیسٹنگ اور تربیتی مراکز کھولنے کی دعوت دی ہے۔انہوں نے پاکستان میں ایک آزاد ٹریننگ اور سرٹیفیکیشن کمپنی کے طور پر کام کرنے کے لیے تکامول کو مکمل تعاون فراہم کرنے کی پیشکش بھی کی۔ مزید یہ کہ ٹی وی ٹی سی پاکستان میں تربیتی اقدامات کے لیے بھی تعاون کر سکتا ہے۔ یہ قابل ذکر ہے کہ نیوٹیک اور ٹی وی ٹی سی بہت جلد ایم او یو پر دستخط کریں گے۔
انسانی وسائل اور سماجی ترقی کے وزیر نے معاون خصوصی کی پیشکش کی تعریف کی اور تکامول کو ہدایت دی کہ وہ معاون خصوصی کی طرف سے دی گئی تجاویز کو عملی جامہ پہنانے کے طریقے تلاش کرے۔دونوں فریقوں نے پاکستان سے ہنر مند افرادی قوت کی برآمد میں اضافے کے عزم کا اعادہ کیا۔
معاون خصوصی جواد سہراب ملک کے ساتھ سعودی عرب میں پاکستان کے سفیر احمد فاروق، ڈائریکٹر جنرل بی ای او ای، اکرم خواجہ، معظم علی ڈپٹی ہیڈ آف مشن اور سہیل بابر وڑائچ، کمیونٹی ویلفیئر اتاشی بھی موجود تھے۔ معاون خصوصی کا دورہ سعودی عرب پاکستان سے سعودی عرب کو افرادی قوت کی برآمد میں تیزی لانے کے لیے پاکستان کی قومی مہم میں انتہائی نتیجہ خیز رہا۔
