معدنی وسائل اور زرخیز زرعی زمین کو درست طریقے سے استعمال میں لایا جائے تو معاشی انقلاب آ سکتا ہے، افتخار علی ملک

لاہور۔27جولائی (اے پی پی):سارک چیمبر آف کامرس اینڈ انڈسٹری کے سابق صدر افتخار علی ملک نے کہا ہے کہ پاکستان معدنی وسائل سے مالا مال ہے، ریکوڈک میں سونے اور تانبے کے دنیا کے پانچویں بڑے ذخائر، کھیوڑہ میں نمک کی دوسری بڑی کانیں اور تھر کول کے ذخائر ہیں جس سے توانائی کی ضرورت پوری ہو سکتی ہے۔ اتوار کو یہاں جاری اپنے ایک بیان میں انہوں نے کہا کہ کوئلے، تانبے، سونے، قدرتی گیس، معدنیات اور زرخیز زرعی زمین کو استعمال کیا جائے تو ملکی معیشت میں انقلاب آ سکتا ہے۔

انہوں نے کہا کہ ملک میں پن بجلی کی بے پناہ صلاحیت موجود ہے۔ دریائے سندھ صاف توانائی کی پیداوار کے بہت زیادہ مواقع فراہم کرتا ہے۔ یہ نہ صرف معاشی ضرورت ہے بلکہ ایک قومی اور اخلاقی ذمہ داری بھی ہے کہ ان وسائل کو اجتماعی ترقی و خوشحالی لانے اور پسماندگی ختم کرنے کے لئے استعمال کیا جائے۔ افتخار علی ملک نے کہا کہ بدانتظامی اور سود کی بلند شرح سرمایہ کاری کی راہ میں رکاوٹ ہے۔

اگر ان وسائل کو موثر طریقے سے استعمال کیا جائے اور کاروبار کے لیے آسانیاں پیدا کی جائیں تو غیر ملکی قرضوں پر انحصار کم کیا جا سکتا ہے، روزگار کے مواقع پیدا کر سکتے ہیں اور صنعتی ترقی کو فروغ دیا جا سکتا ہے۔ صرف کان کنی کا شعبہ اربوں ڈالر کی سرمایہ کاری لا سکتا ہے۔ جب کہ زراعت غذائی تحفظ کو یقینی بنا سکتی ہے اور اضافی زرعی پیدا وار برآمد کی جا سکتی ہے۔ حکومت کو ان وسائل سے فائدہ اٹھانے کے لیے شفاف پالیسیوں، جدید ٹیکنالوجی اور غیر ملکی شراکت داری کو یقینی بنانا چاہیے۔